Xuliqanlıq niyyəti ilə adam öldürməkdə təqsirli bilinən paytaxt sakini Əsgər Məmmədovun məhkəməsi başladı. İttihama görə, Əsgər Məmmədov 2009-cu il avqustun 19-da Yasamal rayonu, Şaiq küçəsi 182 ünvanında Gürcüstan vətəndaşı, 21 yaşlı Anar Vəliyevi ürəyindən bıçaqlayaraq, qətlə yetirib.
Yasamal rayon Prokurorluğu Məmmədovu Cinayət Məcəlləsinin qəsdən adam öldürmə (120.1) maddəsi ilə ittiham edərək, cinayət işinin baxılmasını bu ilin fevralında məhkəməyə göndərib. Hakim Əfqan Hacıyevin sədrliyi ilə start götürən prosesdə zərərçəkmiş tərəf cinayət işinin düzgün aparılmadığını əsas gətirərək, cinayət işinin yenidən prokurorluğa qaytarılmasını və təqsirləndirilən şəxsə CM-nin xuliqanlıq niyyəti ilə adam öldürmə (120.2.2) maddəsi ilə ittiham verilməsi barədə vəsatət qaldırıb. Həmin vaxt prosesə sədrlik edən hakim zərərçəkmiş tərəfin vəsatətini təmin edərək, cinayət işinin yenidən araşdırılması üçün aidiyyəti üzrə prokurorluğa göndərilməsi barədə qərar qəbul edib.
Bakı şəhər Prokurorluğunda iş yenidən araşdırılıb və təqsirləndirilən şəxsin ittihamını ağırlaşdıraraq, cinayət işi yenidən məhkəməyə göndərilib.
Hakim İlham Mahmudovun sədrliyi ilə başlanan prosesdə şahid qismində Tamella Şıxəliyeva ifadə verərək bildirdi ki, təqsirləndirilən Əsgər Məmmədov onların qonşusudur:
"Mən Əsgəri həyətdə gördüm. Su kranında əl-üzünü yuyurdu. Nəsə üzü də şişmişdi. Soruşdum nə olub? Dedi ki, heç nə, məni bir az vurublar. Bayıra çıxanda həyətə 5-6 nəfərin toplaşdığını gördüm. Onlardan nə olduğunu soruşanda bildirdilər ki, bura bir oğlan gəlib, "Kazbek" axtarır. Sonra da həmin oğlanla Əsgər mübahisə edib, o da Əsgəri yumruqla vurub. Sonradan mənə məlum oldu ki, həmin oğlanın mənim qızım Laləyə görə dalana gəldiyini başa düşüb və onu vurub. Bizə prokurorluqda məlum oldu ki, həmin oğlan İlham Ramazanovdur. Onun da mənim qızıma görə dalana gəldiyini bildik".
T.Şıxəliyeva daha sonra qeyd etdi ki, onların yaşadıqları dalana son vaxtlar çoxlu şəxslər gəlir:
"Artıq dalanın sahibi-yiyəsi yoxdur. Kim istəyir ora gəlir. Elə adamlar gəlir ki, biz onları tanımırıq. İlham Ramazanov da həmin gün ora gəlib. Onunla da Əsgər mübahisə edib. O da gedib rəhmətliyi qızışdırıb ki, məni filan yerdə döyüblər, rəhmətlik də ora gəlib. Əgər İlham Ramazanov ora gəlməsəydi, gedib rəhmətliyi göndərməsəydi, belə bir ağır cinayət törədilməzdi".
Təqsirləndirilən Əsgər Məmmədov isə bildirdi ki, İlham Ramazanovun Lalə Şıxəliyevaya görə dalana gəldiyini başa düşüb. Onun sözlərinə görə, sonradan anlayıb ki, heç də belə olmayıb. Daha sonra prosesdə təqsirləndirilən şəxsin qardaşı Ələsgər Məmmədov ifadə verərək bildirdi ki, hadisənin şahidi olmayıb. Lakin zərərçəkmiş tərəfin nümayəndəsi Fərhad Vəliyev bildirdi ki, təqsirləndirilən şəxs ibtidai istintaqa verdiyi sərbəst ifadəsində qardaşı Ələsgərin hadisəni törədərkən yanında olduğunu qeyd edib.
Ələsgər Məmmədov isə nümayəndənin dediklərini təkzib edərək, evdə olduğunu bildirdi. Onun sözlərinə görə, qardaşı cinayəti törədəndən sonra həyətə düşüb: "Səs-küyə çölə çıxdım. Qardaşımın cinayət törətdiyini eşitdim. Mən qardaşımı itələyib içəri saldım. Yaralı şəxsi isə başqa şəxslər apardılar". Zərərçəkmiş şəxsin nümayəndəsi Fərhad Vəliyev hakimlərin diqqətinə çatdırdı ki, hadisə zamanı istifadə olunan bıçaq Yasamal rayon Polis İdarəsinin 27-ci polis bölməsinin əməkdaşları tərəfindən götürülüb. Nümayəndə qeyd etdi ki, maddi sübut kimi götürülən həmin bıçaq istintaq orqanı tərəfindən itirilib. Nümayəndə bu məsələ üçün tədbir görülməsini hakimlərdən xahiş etdi. Hakim isə bildirdi ki, sonda qiymət veriləcək. Hakim daha sonra bildirdi ki, hadisənin əsl şahidi olmuş Əziz Şıxəliyevin məhkəməyə məcburi gətirilməsi üçün tədbirlər görüləcək.
|
