Kənd Təsərrüfatı Nazirliyi yanında Dövlət Baytarlıq Xidmətinin məlumatına əsasən, su basmış kəndlərdə 178 baş iribuynuzlu malın cəsədi, 205 baş xırdabuynuzlu heyvan cəsədi, 24 mindən çox quş cəsədi xüsusi ayrılan yerlərdə dezinyeksiya edilib basdırılıb.
Bundan başqa, Azərbaycanda heyvanlar arasında quduzluq xəstəliyinin artması daha çox daşqın bölgələrində müşahidə olunur. KTN yanında Dövlət Baytarlıq Xidməti vaksinasiya işləri aparmaq üçün BMT-nin Ərzaq və Kənd Təsərrüfatı Təşkilatına müraciət edib. Yaxın bir ay ərzində Azərbaycana quduzluq əleyhinə vaksinlər gondəriləcək. Hazırda xəstəliyin qarşısının alınması üçün təhlükəsizlik tədbirləri görülür.
Dövlət Baytarlıq Xidmətinin rəisi Siyalə Rüstəmovanın sözlərinə görə, artıq müxtəlif yoluxucu xəstəliklərin müayinəsini daha effektli aparmaq mümkün olacaq. Nazirlər Kabineti ilə Amerika Müdafiə Departamenti arasında bağlanan saziş çərçivəsində Dövlət Baytarlıq Xidmətində BSL-2 səviyyəli yeni virusoloji şöbə yaradılıb. Müasir avadanlıqların quraşdırılması 1 milyon dollara başa gəlib.
Təhlükənin Azaldılması üzrə ABŞ Müdafiə Agentliyinin nümayəndəsi Roni Feirklos İctimai televiziyaya açıqlamasında bildirib ki, Azərbaycanla bu sahədə aparılan əməkdaşlıq Amerika Birləşmiş Ştatları üçün vacibdir. Onun sözlərinə görə, "Bioloji Təhlükənin Azaldılması" proqramına uyğun olaraq, baytarlıq laboratoriyasında yaradılan virusoloji şöbə müasir avadanlıqlarla təchiz edilib. Ona görə də bundan sonra müxtəlif xəstəliklərin diaqnozu daha dəqiq müəyyən ediləcək: "Əsas olan təcrübə mübadiləsi aparmaqdır".
Proqrama uyğun olaraq, gələcəkdə 12 zona baytarlıq laboratoriyasında da belə şöbələr yaradılacaq. Bunun üçün 76 milyon dollar vəsait ayrılıb.
|
