Bazar günü Bakı və Naxçıvan şəhərlərində cari tədris ili üçün ölkənin ali təhsil müəssisələrinin magistraturalarına qəbul imtahanının ikinci mərhələsidir.
TQDK sədri Məleykə Abbaszadə həftənin bazar günü imtahanında 6613 bakalavrın iştirak edəcəyini qeyd edib. Onlardan 5752 nəfəri Azərbaycan bölməsinin, 861 nəfəri isə rus bölməsinin məzunudur. Bakalavrların 3051 nəfərini oğlanlar, 3562 nəfərini qızlar təşkil edir. 4072 nəfər ali təhsil müəssisələrinin builki, 2541 nəfər əvvəlki illərin məzunudur. Bakalavrlardan 40 nəfəri xarici ölkə vətəndaşıdır. Ən yaşlı bakalavr 1961-ci il, ən gənci isə 1991-ci il təvəllüdlüdür.
Qəbul imtahanı Bakı şəhərində 9, Naxçıvan şəhərində 1 binada keçirilir. İmtahanın idarə olunması üçün 45 imtahan rəhbəri, 410 nəzarətçi-müəllim cəlb olunub. Saat 11:00-da başlayacaq imtahanda sualların cavablandırılmasına 1 saat 30 dəqiqə vaxt ayrılacaq. İkinci mərhələdə bakalavrların ixtisas üzrə bilikləri test üsulu ilə onlara 50 test tapşırığı təqdim olunmaqla (bəzi proqramlar üzrə isə yazılı imtahanla) yoxlanılır. Bakalavrın hər düzgün cavabı bir balla qiymətləndirilir, səhv cavablar düzgün cavabların nəticəsinə təsir göstərmir.
İmtahanın nəticələri www.tqdk.gov.az internet səhifəsində yerləşdiriləcək. Hər bir bakalavr öz imtahan nəticələrinə dair "məlumat vərəqi"ni internet vasitəsilə əldə edə bilər.
Qəbul imtahanının ikinci mərhələsinin nəticələri elan olunduqdan sonra bakalavrlar iyunun 22-dən 25-dək ali təhsil müəssisələrinin magistraturalarına qəbul aparılan ixtisaslaşmaların müsabiqəsində iştirak etmək üçün internet vasitəsi ilə ixtisaslaşma seçimi aparırlar.
Təhsili ödənişli əsaslarla həyata keçirilən ixtisaslaşmaları seçmək (müsabiqədə iştirak etmək) hüququnu qazanmaq üçün bakalavrın iki mərhələ üzrə imtahandan topladığı ümumi bal (balların cəmi) 75-dən, o cümlədən ixtisas üzrə testdən (essedən, tərcümədən, suallara yazılı cavabdan) topladığı bal 20-dən az olmamalıdır. Tədrisi ingilis dilində olan ixtisaslaşmaları seçmək üçünsə, bunlarla yanaşı, imtahanın birinci mərhələsində bakalavrın ingilis dili üzrə testdən topladığı bal 20-dən az olmamalıdır.
Dövlət sifarişi ilə qəbul aparılan ixtisaslaşmaları seçmək (müsabiqədə iştirak etmək) hüququnu qazanmaq üçün tələb olunan müsabiqə şərtləri ali təhsil müəssisələrinin magistraturalarına qəbul imtahanının ikinci mərhələsinin nəticələri elan olunduqdan sonra TQDK tərəfindən müəyyən ediləcək.
İxtisaslaşma seçimində hər bakalavr 20-dək ixtisaslaşma kodu seçə bilər. Bakalavrın seçdiyi ixtisaslaşmalar onun imtahan verdiyi proqrama aid və bitirdiyi bakalavr ixtisasına müvafiq olmalıdır (ixtisaslaşma seçimi cədvəli "Magistr" jurnalının 2010-cu il 3-cü sayında dərc olunub).
Dövlət hesabına magistraturada təhsil almış magistrlər dövlət sifarişi ilə qəbul aparılan yerləri seçə bilməzlər.
Cari ildə qəbul aparılan ixtisaslaşmalar üçün ayrılmış yerlərin ümumi sayı 5252-dir (2009-cu ildə 5168). Bunlardan 2071-i dövlət sifarişi ilə qəbul aparılan ixtisaslaşmalardır.
Rus bölməsinin abituriyentləri də iyun ayının 20-də "Azərbaycan dili" fənni üzrə imtahan verəcəklər. TQDK-nın məlumatına görə, imtahan Bakı və Naxçıvan şəhərlərində olacaq və 2819 abituriyentin iştirakı nəzərdə tutulur: Onlardan 6 nəfəri Naxçıvandadır. İmtahan saat 11:00-da başlanır.
İmtahanda iştirak edəcək abituriyentlərdən 1347 nəfəri qız, 1472 nəfəri isə oğlandır. Onlardan 1451 nəfəri cari ilin, 1368 nəfəri isə ötən illərin məzunlarıdır.
İmtahan 45 dəqiqə ərzində aparılır və abituriyentlərə "Azərbaycan dili" fənnindən 30 test tapşırığı təqdim edilir. Hər düzgün cavab bir balla qiymətləndirilir. Səhv cavablar düzgün cavabların nəticəsinə təsir göstərmir. Abituriyentlər imtahanın nəticələrini TQDK-nın internet saytından (www.tqdk.gov.az) öyrənə biləcəklər.
Bu il "Azərbaycan dili" fənni üzrə birinci imtahan mayın 23-də keçirilib. Həmin imtahanda 10828 abituriyent iştirak edib ki, onlardan 9324 nəfəri imtahanı müvəffəqiyyətlə verərək "məqbul" qiyməti alıb. Qəbul qaydalarına əsasən, həmin imtahanda "qeyri-məqbul" qiyməti alan abituriyentlərə iyunun 20-də keçiriləcək "Azərbaycan dili" imtahanında təkrarən iştirak imkanı verilir.
"Azərbaycan dili" fənnindən test imtahanının nəticəsi "məqbul" və ya "qeyri-məqbul"la qiymətləndirilir. İmtahanın nəticəsinə görə "məqbul" alan abituriyentlər qəbul imtahanlarına buraxılırlar.
|
