Keçmiş təhlükəsizlik əməkdaşı, Finlandiyadan olan iş adamı Auvo Niiniketo İranda qarovulçu və cangüdənlər xidməti göstərən firma açıb. Bu müəssisənin əsas müştərilərinin İranda fəaliyyət göstərən xarici, əsasən Qərb dövlətlərinə məxsus şirkətlərin təmsilçilərinin olması nəzərdə tutulur.
Auvo Niiniketo Finlandiyanın "Yle.fi" agentliyinə bildirib ki, İslam Respublikasında özəl sektorda peşəkar cangüdənlər yoxdur. Onun sözlərinə görə, hazırda bu ölkədə bu işlə təsadüfi adamlar, "küçədən tutmalar" məşğul olur.
İş adamının qənaətincə, fin təlimatçılar iranlılardan bu məqsəd üçün kadrlar hazırlayacaq. Niiniketo məsələ ilə bağlı bazarın uyğun hissəsini araşdırıb və İrandakı çeşidli şirkətlərin təhlükəsizliyini təmin etmək üçün belə bir firma yaratmaq qərarına gəlib.
Finlandiyalı iş adamı uzun illər ciu-citsu idman növü ilə məşğul olub. Onun dediyinə görə, ölkədə bu əlbəyaxa döyüş növünü öyrənmək istəyən iranlı iş adamları var. Niiniketoya belə bir firma yaratmağı məhz onlar təklif ediblər.
|
