Şou-biznes - Ayna.az

Son aylar mətbuatda və televiziyada nadir gallarda çıxış edən xalq artisti Aygün Kazımova "Ayna" qəzetinə maraqlı açıqlamalar etdi. Əvvəlcə söylədi ki, sənətdə hər addımını özəlləşdirmək məqsədi ilə atır. Yəni onun ayaqqabısını geyənlər çoxdur, lakin xalq artisti heç kimin yerişini yerimir:

"Xatırlayırsınızsa, plastik əməliyyatımı sənədli film şəklində çəkdirən ilk sənət adamı mən olmuşam. Əgər məndən əvvəl bunu edən olsaydı, ömründə onu təkrarlamazdım. Onda mən Aygün Kazımova olmaram. Onsuz da dünyada təkrarçılıq baş alıb gedir. Mən bizimkilərdən kimisə yamsılamıramsa, o demək deyil ki, mənim etdiklərimi məndən əvvəl dünyada heç kim etməyib. Ən azı özümüzünküləri yamsılamamağa çalışıram. Amma yuxarıda çəkdiyim misalın dünyada bənzəri yoxdur. Heç bir sənət adamı plastik əməliyyatını sənədli filmə çevirməyib".

Fərqli dünyagörüşü olan Aygün xanım bir müddət əvvəl özü haqqında kitab da yazıldığını eşidib. Lakin müəllifin ölüm xəbəri xanım sənətçinin arzusunu reallaşdıra bilməyib.

"Kitabı Elşad Quliyev yazmalı idi. Özü mənə təklif etmişdi. Lakin bu təklifdən bir neçə ay sonra dünyasını dəyişdi və bu ideya həllini tapmadı. Bu arzum gerçəkləşmədi. Amma ola bilsin hansısa yazar bu işi üzərinə götürdü.

REKLAM

Amma istəyirəm ki, kitabı əlimə alanda Aygün Kazımovanı görə bilim", - deyə sənətçi bildirdi.

Xalq artistindən son aylar az görünməyinin səbəbini soruşduqda, bunu özü tərəfindən seçilmiş istirahət proqramı kimi dəyərləndirdiyini bildirdi. Onun tez-tez depressiyaya düşdüyünü nəzərə alıb, bu barədə də soruşduq:

"Yox, depressiya üçün səbəb yoxdur. Bir neçə gün əvvəl Moskvadan qayıtmışam. Səfərim bir qədər çəkdi. Gələndən sonra eşitdim ki, Namiq Qaraçuxurlu özünə yeni binalardan mənzil alıb. Əslində, mənzil alacağını bilirdim. Birlikdə mənzilə baxdıq, çox xoşuma gəldi. Hazırda Daxili Qoşunların xətti ilə hərbi hissələrdə verəcəyim konsertlərə hazırlaşıram. Bu silsilə bir layihə olacaq və bu işə böyük məsuliyyətlə yanaşıram. Bunu söyləməkdə məqsədim odur ki, günlərimi sırf istirahət üçün ayırmamışam".

Aygün xanımla onunla küsülü olub, haqqında xoşagəlməz fikirlər danışanlar barədə də danışdıq. Bu məsələdə özünü xeyirxah tərəfdaş kimi görən Aygün Kazımova pis xislətli insanlara onsuz da təsir göstərə bilmədiyini söylədi:

"Hərdən düşünürəm ki, bəzi naqislər getdikcə bir-birinə oxşayır. Çalışıram ki, pis xislətli insanları dəyişdirim, onların vicdanlarını yumşaldım. Bəzən onlara təsir göstərə bilirəm. Amma çox hallarda bu alınmır. Yaxın dostlarım hərdən mənə deyirlər ki, "bu qədər haqsızlığa başqası olsaydı dözməzdi". Düşünürəm ki, mən Allahın sevimli bəndəsiyəm və o məni bütün pisliklərdən qoruyur".

Namiq Qaraçuxurlu ilə münasibətlərinə toxunan Aygün Kazımova bu birliyin hələ uzun zaman davam edəcəyini söylədi. Bunun üçün həm özünə, həm də partnyoruna inandığını bildirdi.

"Hər bir münasibətdə saf sevginin olması vacibdir. Bizim münasibətlərimizdə saxtalıq yoxdur. Əgər Namiq sənəti ilə vidalaşmayacaqsa, biz uzun zaman ayrılmayacayıq. Çünki bizim işimiz birdir, səhnədə bir görünürük. Səhnədən kənarda dərdlərimizi, sevincimizi bölüşürük. Mən Namiqə çox inanıram. Onu tanıyandan sonra həyata baxışlarım dəyişdi", - deyə Aygün Kazımova bildirdi.