Ali Məhkəmənin qərarını saxtalaşdırmaqda ittiham olunan Füzuli Orucov, Kənan Şərifov və Kənan Qafarovun məhkəməsi başa çatdı.
İttihama görə, Gəncə Apellyasiya Məhkəməsinin 24 iyul 2008-ci il tarixli qərarı ilə Türkiyə vətəndaşı Hasan Tarım Yakupa Azərbaycan CM-nin 263.3-cü (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan iki və daha çox şəxsin ölümünə səbəb olduqda) maddəsi ilə təyin olunmuş azadlıqdan məhrumetmə cəzasının müddəti 8 il müəyyən olunub. Ali Məhkəmənin Cinayət İşləri üzrə Məhkəmə Kollegiyasının 9 iyun 2009-cu il tarixli qərarı ilə apellyasiya instansiyası məhkəməsinin həmin qərarını dəyişdirilmədən saxlayıb. Ali Məhkəmənin qeyd edilən qərarının surəti məhkumun cəza çəkdiyi müəssisəyə göndərilib.
Buna baxmayaraq, Ədliyyə Nazirliyi Penitensiar Xidmətinin 6 saylı Cəzaçəkmə Müəssisəsinin Xüsusi Şöbəsindən 24 avqust 2009-cu il tarixdə Ali Məhkəmənin Cinayət İşləri üzrə Məhkəmə Kollegiyası katibliyinə daxil olan şifahi məlumatla müəyyən olunub ki, məhkum Hasan Tarım Yakupun barəsində həmin kollegiyanın 9 iyun 2009-cu il tarixli qərarının olmasına baxmayaraq, hazırda müəssisəyə onun cəzasının Ali Məhkəmənin Cinayət İşləri üzrə Məhkəmə Kollegiyasının 17 iyul 2009-cu il tarixli qərarı ilə dəyişdirilərək 3 il müddətinə azadlıqdan məhrumetmə cəzası ilə əvəz edilməsi barədə əlavə qərar təqdim edilib.
Bununla əlaqədar dərhal cəzaçəkmə müəssisəsinin rəhbərliyinə məlumat verilib ki, Ali Məhkəmənin 09 iyun 2009-cu il tarixli qərarı ilə Gəncə Apellyasiya Məhkəməsi tərəfindən məhkum Hasan Tarım Yakupa Azərbaycan Respublikası CM-nin 263.3-cü maddəsi ilə təyin olunmuş 8 il azadlıqdan məhrumetmə cəzası dəyişdirilmədən saxlanılıb, təqdim olunan 17 iyul 2009-cu il tarixli qərar saxtadır. Göstərilən məlumata müvafiq olaraq məhkum Hasan Tarım Yakup müəssisədən buraxılmayıb.
Həmin saxta sənəd Ali Məhkəmə tərəfindən araşdırılıb hüquqi qiymət verilməsi üçün 25 avqust 2009-cu il tarixdə Baş Prokurorluğa göndərilib.
İstintaq zamanı müəyyən edilmişdir ki, "AzPak Kompanen" şirkətində icraçı direktor vəzifəsində işləyən Kənan Şərifov tərəfindən Ali Məhkəmənin 9 iyun 2009-cu il tarixli qərarı saxtalaşdırılaraq, məzmununa məhkum Hasan Tarım Yakupun cəzasının yüngülləşdirilərək, guya, sonuncunun cəzasının 3 il müddətinə azadlıqdan məhrumetmə ilə əvəz olunması barədə yalan məlumatlar daxil edilib. Törətdiyi cinayət əməlinə görə K. Şərifov, K. Qafarov və F. Orucov barəsində həbs-qətimkan tədbiri seçilib.
Ağır Cinayətlərə Dair İşlər üzrə Məhkəmənin hökmü ilə Füzuli Orucov 12 il, Kənan Şərifov 9 il və Kənan Qafarov 1 il müddətinə azadlıqdan məhrum edilib.
|
