Bakıda dəhşətli qətl hadisəsi baş verib. Bu barədə məlumatı DİN mətbuat xidməti yayıb. Məlumata görə, 2 naməlum şəxs Sabunçu rayonunun Bilgəh qəsəbəsində yaşayan İlqar Şeydabəyovun evinə girib, ona və səsə ayılmış həyat yoldaşı Bikəxanım Şeydabəyovaya bıçaq xəsarətləri yetiriblər. İlqar Şeydabəyov hadisə yerində ölüb, Bikəxanım Şeydabəyova isə 3 saylı Şəhər Klinik Xəstəxanasına yerləşdirilib.

DİN Baş Cinayət-Axtarış İdarəsi, Bakı BPİ-nin Cinayət-Axtarış İdarəsi və Sabunçu RPİ əməkdaşlarının həyata keçirdikləri birgə əməliyyat-axtarış tədbirləri nəticəsində cinayəti törətməkdə şübhəli bilinən Bilgəh qəsəbə sakinləri Hatəm Cəlilov və Xalid Əliyev yaxalanıblar. İstintaqa verdikləri ilkin ifadələrində bildiriblər ki, təxminən 4-5 ay əvvəl dostlar İlqarın evində hörgü işi görüblər və ev sahibinin onların hər birinə 300 manat borcu olub. Öz borclarını tələb etdikdə, İlqar onları şantajla hədələyib.

...Yay mövsümü olduğundan İlqar gecələr evin qapısını açıq qoyurmuş. Cinayətkarlar açıq qapıdan keçərək mətbəxin işığını söndürüblər. Xalid yataq otağına girərək İlqara bıçaq zərbələri vurub və boğazını kəsib. Səsə ayılan Bikəxanıma da bir neçə bıçaq zərbəsi vuraraq hadisə yerini tərk ediblər. Cinayətdə istifadə etdikləri bıçağı isə qəsəbədəki məktəbin həyətinə atıblar.

Faktla bağlı CM-nin 120-ci (qəsdən adam öldürmə) maddəsi ilə Sabunçu rayon Prokurorluğunda cinayət işi başlayıb.