Qatilin cəzası olduğu kimi saxlandı

Bakıda xüsusi amansızlıqla iki nəfəri qətlə yetirməkdə ittiham olunan Gürcüstan vətəndaşı Nazim Acalovun apellyasiya şikayəti üzrə məhkəmə keçirilib.

İttihama görə, 2003-cü il aprelin 3-ü və 8-də Xətai rayonundakı X.Məmmədov küçəsində yandırılmış vəziyyətdə tapılan kişi və qadın meyitlərinin kimliyi müəyyənləşib. Həmin tarixlərdə Xətai rayon Prokurorluğu tərəfindən CM-in 120.1-ci (qəsdən adamöldürmə) maddəsi ilə cinayət işi başlanıb və istintaq aparılıb. Lakin meyitlərin şəxsiyyətləri və cinayəti törətmiş şəxslər müəyyən edilmədiyindən hər iki cinayət işi üzrə icraat həmin ilin oktyabrında dayandırılıb.

2009-cu il yanvarın 22-də Baş Prokurorluğun Ağır Cinayətlərə Dair İşlər üzrə İstintaq İdarəsi tərəfindən iş üzrə icraat təzələnərək intensiv istintaq-əməliyyat tədbirlərinin icrasına başlanıb. İstintaq-əməliyyat tədbirləri nəticəsində həmin meyitlərin 1980-ci il doğumlu Gürcüstan vətəndaşı Askarov Ramin Nizamoviç və onun anası 1957-ci il doğumlu Gürcüstan vətəndaşı Askarova Göyçək Abdulla qızı olduğu müəyyənləşib.

Cinayətin Gürcüstan vətəndaşları Nazim Acalov və onun həyat yoldaşı Raina Əhmədova tərəfindən törədildiyi müəyyən olunub. İstintaq orqanı Raina Əhmədovanın barəsində axtarış elan edib və o, Türkiyə interpolu tərəfindən tutularaq, Azərbaycan hüquq-mühafizə orqanlarına təhvil verilib. Hazırda Raina Əhmədovanın istintaqı davam edir.

Ağır Cinayətlərə Dair İşlər üzrə Məhkəmənin hökmü ilə Nazim Acalov 15 il müddətinə azadlıqdan məhrum edilib. Həmin hökmlə razı olmayan Acalov apellyasiya şikayəti verib. O, apellyasiya şikayətində günahsızlığını və baş vermiş cinayətdən xəbərsiz olduğunu qeyd edib. Buna görə də bərəsində bəraət hökmü çıxarılmasını istəyib.

Bakı Apellyasiya Məhkəməsində hakim Camal Ramazanovun sədrliyi ilə keçirilən prosesdə apellyasiya şikayətinə baxılaraq, təqsirləndirilən şəxsin bəraət istəməsi ilə bağlı şikayəti rədd edilmiş və birinci məhkəmə instansiyasının hökmü qüvvədə saxlanmışdır.