- Teatrdakı karyeram "Arşın mal alan"dan başladı. Mən Asəf Zeynallı adına Musiqi Kollecinin aspiranturasını bitirən kimi konservatoriyaya daxil oldum. Aspiranturanı bitirən kimi Opera və Balet Teatrına gəldim. Konservatoriyada müəllimim Elmira Quliyeva olub. Mənə verdiyi təhsilə görə ona çox minnətdaram. Opera və Balet Teatrında isə peşəkarlığımın artmasında mənə əməkdar artist, konsertmeyster Məlahət İsmayılova kömək etdi. Onun musiqiyə peşəkar yanaşması mənə karyeramda çox yardımçı oldu. Və əlbəttə, mən bizim teatrın direktoru Arif Məlikova onun gənclərə göstərdiyi sonsuz səbrinə görə çox minnətdaram.
- Son rolunuz haqqında nə danışa bilərsiniz? Səhv etmirəmsə, bu yaxınlarda Heydər Əliyev Sarayında Nərgiz Paşayevanın "İntizar" librettosunun təqdimatı olmuşdu.
- "İntizar" operasını bəstəkar Firəngiz Əlizadə müasir janrda yazıb. Bu çox çətin, eyni zamanda maraqlı bir iş idi. Opera professor Nərgiz Paşayevanın librettosuna yazılıb. Nərgiz xanımın təşəbbüsü ilə Azərbaycana mütəxəssislər dəvət olunmuşdu: quruluşçu rejissor Dmitri Bertman, quruluşçu rəssam Hartmut Şorqhefer, dirijor Vladimir Ponki, xoreoqraf Edvard Smirnov və başqaları. Bu operada iştirak edən bütün solistlər adından, bizə bu kimi peşəkarlarla işləmək imkanı yaratdığına görə Nərgiz xanım Paşayevaya dərin minnətdarlığımı bildirmək istəyirəm. Və əlbəttə ki, Məlahət xanım İsmayılovanın əməyini unuda bilmərik. O, peşəkarlıqda heç də xarici həmkarlarından geri qalmır.
- İlk çıxışınızı xatırlayırsınızmı? Yəqin, çox böyük həyəcan keçirirdiniz...
- Həmin günü unutmaq olarmı? Səhnənin pərdələri açılır və projektorların işıqları gözlərini qamaşdırır, qəlbin həyəcanla dolur. Lakin ilk kəlmələri səsləndirən kimi həyəcanım keçmişdi və hər səhnəyə çıxdıqca getdikcə azalırdı.
- Bu gün bir çox opera ifaçısı estrada müğənnisi qismində çıxış edir. Bəs sizin necə, belə tələbatınız varmı?
- Düşünürəm ki, bu hər ifaçının öz şəxsi işidir. Hələ ki, var gücümü operaya verirəm. Lakin fikirləşirəm ki, opera və estradanı bir araya gətirmək heç də pis fikir deyil. Beləliklə gənc nəsli opera musiqisini dinləməyə həvəsləndirmək olar. Çünki gənclər əsasən estrada musiqisini dinləyirlər. Mənə estrada müğənnisi ilə duet oxumaq maraqlı olardı. Məni daha çox muğam ifaçılarımızla iş birliyi cəlb edir.
- Hazırda nə üzərində çalışırsınız?
- Çox maraqlı opera olacaq. İndi mən "Aida" operasından Amneris obrazı, "Trubadur" operasından isə Azuçena obrazları üzərində çalışıram.
|
