Məcburi köçkünlərin və əlillərin pulunu dələduzluq yolu ilə mənimsəməkdə təqsirləndirilən Tərtər rayon Hərbi Komissarlığının hüquqşünası və digər 4 nəfərin cinayət işi baxılmaq üçün məhkəməyə göndərilib. Bu barədə "Ayna"ya Ağır Cinayətlərə Dair İşlər üzrə Məhkəmədən məlumat verilib.
Təqsirləndirilənlər - Rəşad Ramiz oğlu Hüseynov, Sevil Kamal qızı Sultanova, onun bacısı Dilbazi Sultanova, Elmira Şükür qızı Abdullayeva və Ülviyyə Paşa qızı Həsənovanın cinayət işi hakim Şəkər Məmmədovanın icraatına verilib. Məhkəmənin hazırlıq iclası iyunun 11-də keçirilib.
İttihama görə, adıçəkilən şəxslər əlbir olaraq məcburi köçkün və əlillər üçün rayonda tikilən binadan mənzil verilməsinə kömək edəcəkləri adı altında zərərçəkənlərdən 100 min manatdan artıq pul alıblar. Cinayət işi üzrə 18 nəfər zərərçəkən var.
Təqsirləndirilən şəxslər CM 178-ci (dələduzluq) maddələri ilə ittiham olunurlar. Fəqət burası da var ki, qanunlarımız dələduzlarla "yumşaq" rəftar edir.
Zərərçəkən tərəfin bir qisminin müdafiəsi isə Qarabağ Azadlıq Təşkilatı tərəfindən təmin olunur.
|
