Şimal bölgəsində çoxlu Rusiya vətəndaşı yaşayır

Dünən Dövlət Miqrasiya Xidmətinin (DMX) Xaçmaz Regional İdarəsi fəaliyyətə başlayıb. Xaçmaz şəhərində inşa edilən yeni inzibati binanın açılış mərasimində DMX rəisi Arzu Rəhimov, rayon rəhbərliyi və ictimaiyyət nümayəndələri iştirak edib.

Xaçmaz rayon İcra Hakimiyyətinin başçısı Şəmsəddin Xanbabayev şimal bölgəsində Regional Miqrasiya İdarəsinin fəaliyyətə başlaması və burada əməkdaşlar üçün normal iş şəraitinin yaradılması üçün bütün zəruri tədbirlərin həyata keçirildiyini bildirib.

DMX-nin dörd regional idarəsinin - Bakı, Şirvan, Yevlax və Lənkəran regional idarələrinin artıq işə başladığını nəzərə çatdıran Arzu Rəhimov Xaçmazdan sonra digər regionlarda da idarə və qanunsuz miqrantların saxlanma mərkəzlərinin tikinti işlərinin intensiv davam etdiriləcəyini bildirib.

Arzu Rəhimov müraciət edənlərin rahatlığının təmin edilməsi, onların regionlardan uzaq məsafə qət etməməsi, həmçinin xidmət fəaliyyətinin genişləndirilməsi məqsədilə qurumun regional idarələrinin təşkilinin səmərə verdiyini vurğulayıb. Daha sonra mərasim iştirakçıları Xaçmaz Regional Miqrasiya İdarəsinin müasir avadanlıqlarla təchiz olunan yeni ikimərtəbəli binasına baxış keçirib.

Açılış mərasimi ərəfəsində jurnalistlərin suallarını cavablandıran A.Rəhimov Azərbaycanın şimal bölgəsində çoxlu sayda Rusiya vətəndaşının yaşadığını vurğulayıb:

"Uzun müddətdir, ölkənin şimal bölgəsində çoxlu sayda Rusiya vətəndaşı yaşayır. Onların bir qismi əmək fəaliyyəti, bir qismi isə yaşamaq üçün Azərbaycana gəlib".

Xidmət rəisi əsas məqsədin həmin insanların Azərbaycan Respublikasının qanunlarına riayət etməsini, ölkəmizdə fəaliyyət göstərmək üçün müvafiq icazə almasını təmin etmək olduğunu bildirib: "Xaçmaz Regional Miqrasiya İdarəsinin fəaliyyətə başlaması ilə bu məsələ qanuni həllini tapacaq".