Rusiyanın İranla hərbi məzmunlu əməkdaşlığı bu ölkənin Qərblə münasibətlərində çoxgedişli kombinasiyalara bənzəməkdədir. Bir müddət öncə Kreml elan etmişdi ki, İrana S-300 tipli raket qurğusu göndərməyəcək. Neçə illərdir Rusiya Buşəhr Atom Elektrik Stansiyasındakı işləri başa çatıdıra "bilmir", bu layihə ətrafında Moskvadan ziddiyyətli bəyanatlar bir-birini əvəz edir. Buşəhr AES-in ümumiyyətlə fəaliyyətə başlayacağı böyük bir şübhə altındadır. Və RF-nin bu davrınışı Qərb tərəfindən birdən-birə mükafatlandırılır...
Rusiyanın "Rosoboroneksport", Tulanın cihazqayırma zavodu, Moskva Aviasiya İnstitutu (MAİ), D.İ. Mendeleyev adına Rusiya Kimya-texnologiya Universitetinə ABŞ-ın qoyuduğu sanksiyanın birtərəfli qaydada ləğvi buna örnək göstərilir. Halbuki
Rusiyanın bu qurumlarına qarşı yasaqlar çeşidli dövrlərdə onların İran, Şimali Koreya və Suriya ilə əməkdaşlığına görə (onların kütləvi qırğın silahı proqramlarına yardıma görə) tətbiq olunmuşdu.
MAİ və Mendeleyev adına universitet isə yanvarın 8-i 1999-cu ildə, Tuladakı cihazqayırma zavodu aprelin 29-u 1999-cu ildə, "Rosoboroneksport" oktyabrın 23-ü 2008-ci ildə ABŞ-ın sanksiyası ilə üzləşmişdi.
Sanksiyanın ləğvi ilə bağlı Ağ Ev bu günlərdə verdiyi açıqlamada bildirib ki, bu qurumlarla əməkdaşlıq "ABŞ-ın milli təhlükəsizliyi və xarici siyasəti ilə bağlı maraqlarına cavab verir". Bu qərar isə mayın 21-dən etibarən qüvvəyə minib.
Ötən gün Rusiya xarici işlər nazirinin müavini Sergey Rıbakov deyib ki, sanksiyanın götürülməsi Rusiya-ABŞ əlaqələrinin inkişafı buaxımından çox yaxşı haldır, ancaq federasiyanın İrana münasibəti ilə bunun heç bir əlaqəsi yoxdur.
Xatırladaq ki, İran prezidenti Əhmədinejad Rusiyanı Tehran hakimiyyətinə sanksiya tətbiqi planını dəstəklədiyi üçün kəskin tənqid edərək bildirmişdi: "Mən Rusiya hakimiyyətinin yerinə olsa idim, bir az ehtiyatlı mövqe tutardım". Rıbakov bu məsələyə də münasibət bildirərək, deyib ki, ölkəsinin İranın atom-nüvə proqramına münasibəti dəyişməyib.
|
