Qətərin paytaxtı Dohada sayca 10-cu forum Azərbaycan heyəti üçün səmərəli və məhsuldar sayıla bilər. Heyətin üzvü, millət vəkili Qənirə Paşayevaya istinadən forum çərçivəsində bir sıra vacib görüşlər keçirilmiş, önəm daşıyan məsələlərə dair Azərbaycanın mövqeyi sərgilənmişdir.
Bildirildiyi kimi, forum bu ölkənin Xarici İşlər Nazirliyi, Qətər Universiteti və Qətərin İş Adamları Birliyinin təşkilatçılığı ilə keçirilirdi. Beynəlxalq dialoqa həsr olunmuş bu forumda siyasi, iqtisadi, humanitar sahədə əməkdaşlıq ruhunun perspektivinə dair fikir mübadiləsi aparılırdı. Alınan bilgilərə görə, bizim heyət Avropa Parlamentinin vitse-prezidenti Rodi Kratsia ilə görüşdə isə Dağlıq Qarabağ münaqişəsi, Avropa Parlamentinin bir neçə gün əvvəl bu istiqamətdə qəbul etdiyi qərar ətrafında müzakirələr aparılıb. Millət vəkili Qənirə Paşayeva vurğulayıb ki, azərbaycanlı qaçqın və məcburi köçkünlər öz yurd-yuvalarına, öz evlərinə dönmələri istiqamətində təşkilatın Dağlıq Qarabağ münaqişəsinin tənzimlənməsində səylərini daha da artıracağını gözləyirlər.
Macarıstanın baş naziri Qordon Baynai ilə görüşdə baş nazir öz ölkəsinin Azərbaycanla əməkdaşlığın genişlənməsinə böyük önəm verdiyini və iki ölkə arasında əməkdaşlığın getdikcə daha da artmasının önəmindən danışıb.
Azərbaycan heyətinin ABŞ konqresmenləri Brayn Braid və Linkoln Davis ilə görüşdə də Dağlıq Qarabağ münaqişəsi diqqət mərkəzində olub. Qənirə Paşayeva ATƏT Minsk Qrupunun həmsədri kimi münaqişənin tənzimlənməsində Birləşmiş Ştatların Ermənistana təzyiqlər göstərməsinin vacibliyini vurğulayıb və onlardan ədalətin dəstəklənməsində səylərini artırmaları xahiş olunmuşdur. Onlara Ermənistanın Azərbaycan torpaqlarının 20 faizini işğal etməsi, azərbaycanlı qaçqın və məcburi köçkünlər barədə daha geniş məlumatlar verilib və materiallar təqdim edilib.
CAR sosial inkişaf naziri İh Meyer, Somalinin naziri Abdi Raşhid Mohamed Abdi ilə görüş zamanı onlara Azərbaycanla bağlı və Ermənistanın Azərbaycan ərazilərinin 20 faizini işğal altında saxlaması, işğal etdiyi ərazilərdə törətdiyi vandalizm aktları ilə bağlı ətraflı məlumatlar verilib və beynəlxalq təşkilatlar çərçivəsində bu iki Afrika ölkəsindən dəstək umduqlarını söyləmişlər.
Kanada parlamentinin deputatı Pol Devar, Suriya parlamentinin üzvü Vaha Edin Hasan, Cənubi Koreya parlamentinin üzvü Sond Min-Soon ilə görüş zamanı da Azərbaycan heyəti onlara Dağlıq Qarabağ münaqişəsi ilə bağlı məlumat vermişlər. Bizim heyət forum çərçivəsində YUNESKO-nun xoşməramlı səfiri xanım İvonne A-Baki, Türkiyə, İtaliya, Mərakeş, Oman, Misir, Qətər, İordaniya da daxil olmaqla bir neçə ölkədən forumda iştirak edən nümayəndələr, beynəlxlaq təşkilatların və media qurumlarının rəsmiləri ilə də görüşlər keçiriblər.
|
