İyul ayının əvvəlində Bakıda Bakı- Tbilisi-Qars (BTQ) yeni dəmiryol bağlantısı layihəsi üzrə üçtərəfli Koordinasiya Şurasının iclası keçiriləcək. Bu barədə APA-ya Nəqliyyat Nazirliyi nəqliyyat siyasəti və iqtisadiyyat şöbəsinin müdiri Sədrəddin Məmmədov məlumat verib.
S.Məmmədovun sözlərinə görə, Azərbaycan, Gürcüstan və Türkiyə nazirlərinin rəhbərlik etdiyi heyətlərin iştirakı ilə keçiriləcək iclasda layihə üzrə görülmüş işlər, iş qrafikinin icrası və həyata keçiriləcək tədbirlər müzakirə olunacaq.
Qeyd edək ki, BTQ-nin tikintisi ilə bağlı Azərbaycan, Gürcüstan və Türkiyə arasında yekun sənəd 2007-ci il fevralın 8-də Tbilisidə imzalanıb. Yeni dəmiryolun çəkiliş işlərinə 2007-ci il noyabrın 21-də start verilib. Azərbaycan yolun Gürcüstan ərazisinə düşən hissəsinin tikintisi üçün bu ölkənin "Marabda-Kartsaxi Dəmir Yolları" MMC-yə güzəştli şərtlərlə (illik 1%-lə 25 illiyə) 200 mln. ABŞ dolları məbləğində kredit ayırıb. Bu vəsait hesabına Gürcüstan ərazisində 29 km uzunluğunda yeni yol, Türkiyə ilə sərhəddə təkər dəyişmə məntəqəsi tikiləcək, həmçinin köhnə yol rekonstruksiya olunacaq. Layihənin ümumi dəyəri isə 600 mln. dollardan artıqdır. Yolun Gürcüstan hissəsinin çəkilişini Azərbaycanın "Azərinşaatservis" şirkəti həyata keçirir.
Yolun 2011-ci ilin ortalarına qədər istifadəyə verilməsi planlaşdırılır. Türkiyə ərazisində isə Gürcüstanla sərhəddən Qarsa qədər uzunluğu 76 km olan yeni dəmiryol xətti çəkilir.
|
