Dünən Qazaxıstanın paytaxtı Astanada birinci KADEX-2010 beynəlxalq hərbi texnika sərgisi işə başlayıb. Bu barədə "MilAz" İA-ya Qazaxıstan Müdafiə Nazirliyinin mətbuat xidmətindən xəbər verilib. "Astana-Exro" sərgi mərkəzində təşkil olunmuş hərbi sərginin açılışında Qazaxıstan prezidenti Nursultan Nazarbayev və Türkiyə prezidenti Abdulla Gül də iştirak edib.
Qazaxıstanın müdafiə naziri Adilbek Cakaşbekov açılış mərasimində çıxış edərək bildirib ki, sərginin təşkilində məqsəd dünyanın müdafiə sektorunda fəaliyyət göstərən iri şirkətləri Qazaxıstana cəlb etmək, eyni zamanda SQ-nin tələbatını ən müasir avadanlıqlarla təmin etməkdir. Nazir sərgi çərçivəsində ikitərəfli görüşlərin keçiriləcəyini və müqavilələrin imzalanacağını da vurğulayıb.
Sərgi Qazaxıstanın Hərbi Hava Qüvvələrinin aviaşousu ilə başlayıb. Qazaxıstan MN-in Aeromobil Qoşunlarına məxsus desant qrupları sərgi keçirilən əraziyə endirilib.
Sərgiyə Çin, İran və Koreyanın müdafiə nazirləri, Rusiya, Ukrayna, Belarusdan müdafiə sənayesi üzrə dövlət strukturlarının və iri dövlət şirkətlərinin rəhbərləri qatılıb.
Qazaxıstan MN sərgidə Azərbaycanın istehsalı olan silah və texnikanın nümayiş olunmadığını, lakin Azərbaycan MN-in yüksəkrütbəli nümayəndələrinin ziyarətçi qismində tədbirə qatıldığını açıqlayıb. Əldə olunan məlumatlara görə, Azərbaycan tərəfi sərgidə təqdim olunan bir sıra silah və hərbi texnika, onların taktiki-texniki xarakteristikası, qiymətləri və istifadə qaydaları ilə maraqlanıb.
Qeyd edək ki, sərgi mərkəzində 4 pavilyonda dünyanın 20 ölkəsindən 200 şirkət öz məhsullarını nümayiş etdirir. Bu məhsullar arasında hərbi texnikalar, İT avadanlıqlar və rabitə vasitələri, hərbi tikinti və infrastruktur, mühəndis - texniki, arxa cəbhə və hərbi tibb avadanlıqları nümayiş etdirilir.
|
