Avropa Komissiyasının sədri Joze Manuel Barrozo və Ermənistan prezidenti Serj Sarqsyanın Brüsseldə keçirdikləri birgə mətbuat konfransında tərəflər arasında fikir ayrılığı ortaya çıxıb(APA).
"Armenia today" portalının məlumatına görə, Barrozo Avropa Birliyinin ATƏT-in Minsk Qrupu çərçivəsində Dağlıq Qarabağ münaqişəsinin həllinə dəstək verməyə hazır olduğunu deyib. O bildirib ki, digər dövlətlər, o cümlədən Rusiya və Azərbaycan Dağlıq Qarabağı danışıqların tərəfi kimi görmürlər.
Ermənistan prezidenti isə DQ-nin tərəf kimi danışıqlara qatılmasının alternativinin olmadığını söyləyib:
"Dağlıq Qarabağda keçirilmiş parlament seçkiləri göstərdi ki, DQR xalqı müasir demokratik dövlət qura bilib. Əks halda Dağlıq Qarabağda səhra komandirləri və ya digər qüvvələr hökmranlıq edərdi. Biz bunun əleyhinəyik. Erməni tərəfinin mövqeyini nəzərə almaq vacibdir".
Barrozo isə AB-nin xarici işlər və təhlükəsizlik siyasəti üzrə ali komissarı Ketrin Eştonun bəyanatını xatırladıb. Eşton bəyan edib ki, AB Dağlıq Qarabağdakı parlament seçkilərinin hüquqi və konstitusion çərçivələrini tanımır. Avropa Komissiyasının sədri məcburi köçkünlərin qayıdışı, mülkiyyət hüququ, öz müqəddəratını təyinetmə hüququ, təhlükəsizlik və qüvvələrin çıxarılması əsasında münaqişənin həllinə dəstək verəcəklərini vurğulayıb.
S.Sarqsyan isə AB və digər beynəlxalq strukturların "DQR"də keçirilmiş seçkiləri tanımamasının qəribə olduğunu deyib: "Biz bunu çox qəribə hesab edirik və səbəblərini anlamağa çalışırıq".
|
