Mahmud Əhmədinejad prezidentliyinin ilk illərində ölkənin Neft Nazirliyindəki "mafiya"ya qarşı mübarizə vəd etmişdi. Sonradan bəlli oldu ki, bu vəd sabiq prezident Haşimi-Rəfsəncaniyə qarşı mübarizədən başqa bir nəsnə deyil. Evsiz ailələr və ailə qurmaq istəyən gənclərin mənzillə təmini üçün fond yaradacağını vəd etdi - bu da təbliğatdan uzağa getmədi.
Ötən həftə Əhmədinejad əhalinin sayının artmasını vacib saydı və yeni vədlər verdi. Bu, səbəbsiz deyildi - mövcud sosial problemlər ucbatından gənclər gec ailə qurur. Eləcə də ənənəvi çoxuşaqlılıq öz yerini ailədə bir və ya iki uşağa verir. Belə bir hal perspektivdə ciddi demoqrafik problemlər yaşanacağından xəbər verir. Bundan başqa, islam inqilabının ilk illərində çox böyük gənclik kütləsinin məhv edilməsi, İran - İraq savaşında qurban getməsi (rəsmi rəqəmlərə görə 1,5 milyon nəfər) bu prosesə öz möhrünü vurmuşdur.
Bu günlərdə hökumət başçısı paytaxt Tehranın bələdiyyə şurası üzvləri ilə görüşdə İranın 30 ildən sonra Qərbin üzləşdiyi demoqrafik problemlə üzləşəcəyindən ehtiyatlandığını söyləyib. Xatırladıb ki, 40 il əvvəl amerikalılar və avropalılar ailə planlaşdırması haqda qanunu təsdiqləmişdir.
Rəsmi rəqəmlərə əsasən, İran əhalisi 74 milyondur. Onların 60 faizini 30 yaşadək gənclər təşkil edir. Prezident isə əhalini 120 milyona çatdırmaq istədiyini deyir. Necə deyərlər, bu işlə özü məşğul olacaq.
Əhmədinejadın düşüncəsinə görə, "hər ailədə iki uşaq" artıq aktual deyil. O, ölkəsini bölgədə aparıcı mövqeyə çıxarmaq istədiyini gizlətmir və hesab edir ki, əhalinin say artımı bu məsələyə müsbət təsir göstərəcək.
Doğulan hər uşaq üçün Əhmədinejad ailəyə 780 avro həvəsləndirici müavinət boyun olub. Yeri gəlmişkən, hələ 1993-cü ildə İran rəhbərliyi əhalinin sayının azaldılması (planlaşdırılıması) məqsədi ilə Misirdə keçirilən beynəlxalq toplantıya bu şüarla getmişdi: "Övladın az olması - yaşamın yaxşı olması!" (farscası: "Fərzəndi kəmtər - zendegi behtər!"). O zaman müxalifətçilər deyirdilər: "Şah dönəmində aborta qarşı çıxan hakimiyyət indi təbii artımın qarşısını zorla almaq istəyir".
Heç kəs İran prezidentinin vəd vermək hüququnu əlindən ala bilməz. Hökumət və parlament isə bu barədə heç bir qərar, yaxud qanun qəbul etməyib.
|
