İmişlidə operativ qərargah yaradılıb

Baş verən təbii fəlakətin nəticələrinin aradan qaldırılması məqsədi ilə İmişli rayonunun Bəhramtəpə qəsəbəsində operativ qərargah yaradılıb. Məlumata görə, daxili işlər naziri Ramil Usubov, "Meliorasiya və Su Təsərrüfatı" ASC-nin prezidenti Əhməd Əhmədzadə hazırda qərargahda fəlakətlə əlaqədar önləyici tədbirlər planı üzərində iş aparırlar.

Ə.Əhmədzadə jurnalistlərə açıqlamasında vəziyyətin kritik olaraq qaldığını deyib. Onun sözlərinə görə, Kürdə 1 saniyədə 2500 kubmetr su axır: "Şkala 950-ni göstərir. Tədbirlər görülür. Kürdə heç vaxt saniyədə 1600 kubmetrdən artıq su keçməyib. Biz az fəsadla suyu ötürmək üçün tədbirlər görürük".

ASC prezidenti Kürün deltasının lildən təmizlənməsi prosesinin davam etdirildiyini də deyib: "Bunun da təsiri özünü göstərir. Deltada artıq ana Kür açılıb".

Ə.Əhmədzadə Araz çayında saniyədə 1200 kubmetr su axdığını da deyib: "Son 15 gündə Araz saniyədə 850-1200 kubmetr su ötürüb. Ötürücülük bundan da çox ola bilər. Belə olsa, tədbirlər görüləcək. Araz əvvəlki yataqlarına yönləndiriləcək. Bu gün işə başlayacaqlar. Qısa zamanda bunu etmək mümkündür. Suyun səviyyəsi böhran həddinə çatsa, Arazı yönləndirməyə çalışacağıq ki, sonradan suyu İranla bölüşdürə bilək".

Daxili işlər naziri Ramil Usubov da jurnalistlərə açıqlamasında yaxın iki gündə Arazın kanal vasitəsilə digər istiqamətə yönləndiriləcəyini deyib.

Nazir Azərbaycan prezidentinin sərəncamına əsasən fəlakətin nəticələrinin aradan qaldırılmasına məsul olan bütün qurumların nümayəndələrinin fəlakət bölgəsində olduqlarını deyib.

R.Usubovun sözlərinə görə, hazırda İmişli, Sabirabad, Saatlı və Hacıqabul rayonlarında Daxili Qoşunların 2000-ə yaxın qüvvəsi və polis əməkdaşları təbii fəlakətin nəticələrinin aradan qaldırılması prosesində iştirak edir.

Qeyd edək ki, Şirvan şəhərinin Bayramlı qəsəbəsində də operativ qərargah fəaliyyət göstərir.