Bir qrup qeyri-hökumət təşkilatı cümə günü "Mədən sənayesində şəffaflığın artırılması" koalisiyasının ofisində Azərbaycanın bir sıra rayonlarında baş verən daşqınlara həsr edilmiş iclas keçirib ("Turan").
İclasda qeyd edilib ki, daşqın zonasında vəziyyət böhranlı olaraq qalır və bəzi yaşayış məntəqələri və kənd təsərrüfatı yerlərinin də su altında qalma ehtimalı var. QHT-lərin məlumatına görə, fəlakət zonasında daha çox ərazini su basmasının qarşısının alınması və fəlakətin nəticələrinin aradan qaldırılması üzrə kifayət qədər tədbirlər görülmür.
Daşqın təhlükəsi olan bütün istiqamətlərdə texnikadan istifadə olunmur. Bir sıra kəndlərin sakinləri əl altında olan vasitələrdən istifadə edir və texnikaya - maşınlara, ekskavatorlara və s. ehtiyac duyurlar. İnsanların içməli su, ərzaq problemləri var.
İqtisadi Araşdırmalar Mərkəzinin rəhbəri Qubad İbadoğlu bildirib ki, daşqına məruz qalmış Saatlı, Sabirabad, Şirvan və digər rayonlar ölkənin əsas meyvə-tərəvəz təchizatçılarıdır. Bu məhsulun 33 faizi burada istehsal olunur. "İstehsalçılara vurulan ziyanı dövlət ödəməli olacaq", - deyə o bildirib.
Qubadoğlunun fikrincə, dövlətin fəlakətin nəticələrinin aradan qaldırılmasına və gələcək üçün qabaqlayıcı tədbirlərin həyata keçirilməsinə yönəldilməsi mümkün olan vəsaiti var. Onun bildirdiyinə görə, ehtiyat fondunda 200 milyon manat, prezident fondunda isə 160 milyon manat vəsait toplanıb, dövlət büdcəsindən də bu məqsədlə 240 milyon manat ayırmaq olar.
Çıxışlar zamanı vətəndaş cəmiyyəti nümayəndələri qeyd ediblər ki, daşqın təbii fəlakət deyil, uzun illər daşqına yol verilməməsi üçün qabaqlayıcı tədbirlər görməyən hökumətin yanlış fəaliyyətinin nəticəsidir.
Kür çayının dibinin təmizlənməsi və sahillərin bərkidilməsi üzrə müntəzəm işlər həyata keçirilməyib, kollektorlar və drenaj sistemləri lazımi qaydada təmizlənməyib, baxmayaraq ki, son üç ildə bu məqsədlə 170 milyon manat ayrılıb.
Vətəndaş cəmiyyətinin fəlakətin nəticələrinin aradan qaldırılmasında daha fəal iştirakı məqsədilə "Kür" şərti adı altında QHT qərargahının yaradılması haqqında qərar qəbul edilib. İlk növbədə qərargah fəlakət zonasından daha dəqiq təsəvvür yaratmaq üçün informasiya toplanmasını həyata keçirməlidir. Sonradan qərargah daşqının nəticələrinin aradan qaldırılmasına və fəlakət baş vermiş zonada normal həyatın bərpasına yardım edəcək.
|
