Unibank Premyer Liqasında ötən həftəsonu keçirilən son turla futbol üzrə XVIII Azərbaycan çempionatına yekun vuruldu. Bakının "İnter" klubu tarixində ikinci dəfə Azərbaycan çempionu oldu. Paytaxtın "Bakı" komandası çempionatın gümüş, "Qarabağ" isə bürünc medallara sahib çıxdı. Son tur ərəfəsində çempion titulunu qazanmağa ən yaxın olan "Xəzər-Lənkəran" isə çempionatı dördüncü pillədə başa vurdu.
Son turda bütün futbolsevərlərin diqqəti Lənkərana yönəlmişdi. Şəhər stadionunda "Xəzər-Lənkəran"la "Bakı" arasındakı oyun çempionluğun taleyinə aydınlıq gətirməli idi. Cənub təmsilçisi qızıl medalları qazanmaq üçün son ölkə çempionuna üstün gəlməli idi. Amma Ağasəlim Mircavadovun baş məşqçi olduğu komanda 2007-ci ildəki uğurunu təkrarlaya bilmədi. Matçın taleyini Aleksandr Şoliçin matçın 27-ci dəqiqəsində vurduğu bir qol həll etdi. Beləliklə, sonuncu turadək lider olan "Xəzər-Lənkəran" rəqibə minimal hesabla uduzaraq, turnir cədvəlində dördüncü pilləyə düşdü və çempionatı medalsız başa vurdu. Qeyd edək ki, bu komandalar sabah, ölkə kubokunun final matçında yenidən üz-üzə gələcəklər.
Gürcü mütəxəssis Kaxaber Sxadadzenin başçılıq etdiyi "İnter" qızıl medallara "Qəbələ" üzərində böyük hesablı qələbə və əsas rəqibləri "Xəzər-Lənəkran"la "Qarabağ"ın xal itirməsi sayəsində sahib oldu. "Qarabağ" isə "Neftçi"nin müqavimətini qıra bilmədi və qazandığı 1 xal sayəsində Lənkəran komandası ilə xallarını bərabərləşdirsə də (27 xal), şəxsi göstəricilərdə üstün oldu və bürünc medala layiq görüldü. Gümüş medalı 28 xal toplayan "Bakı" qazandı. Çempionluğu isə 29 xalla "İnter" bayram edib.
Qeyd edək ki, avrokuboklara çıxan komandalarımızın bu dördlükdən ibarət olması, hələ ötən tur rəsmiləşmişdi. Son turdakı nəticələrindən asılı olmayaraq, "Standard" və "Karvan" çempionatı turnir cədvəlinin son pilləsində başa vurdular. Bu komandalar növbəti mövsüm birinci divizionda çıxış edəcəklər. Maraqlıdır, "Standard"da oynayan Fərid Quliyev çempionatı bombirdir kimi başa vurdu - 16 qol. Ən sərrast futbolçuların siyahısında ikinci yer rəqib qapılarından 15 top keçirmiş Anatoli Doroşa ("Olimpik-Şüvəlan") məxsusdur. Üçüncü sırada Robertas Poskuşdur ("İnter") - 12 qol.
Mövsümə mayın 23-də "Bakı" və "Xəzər-Lənkəran" arasında keçiriləcək Azərbaycan kubokunun final matçı ilə yekun vurulacaq.
Son turun oyunlarının nəticələri: "Karvan"- "Turan"- 1:4, "Olimpik-Şüvəlan" - "Muğan" - 2:0, "Simurğ" - "Standard" - 4:0, "Xəzər-Lənkəran" - "Bakı" - 0:1, "Neftçi" - "Qarabağ" - 0:0. "İnter" - "Qəbələ" - 4:1.
1-6-cı YERLƏR: 1."İnter" (29 xal), 2."Bakı" (28), 3. "Qarabağ" (27), 4. "Xəzər-Lənkəran" (27), 5. "Neftçi"(23), 6. "Qəbələ"(20); 7-12-ci YERLƏR: 7. "Olimpik"-Şüvəlan" (36), 8. "Simurğ"(31), 9. "Turan" (29), 10. "Muğan" (27), 11. "Standard" (25), 12. "Karvan" (13).
|
