"Eurovision-2010" müsabiqəsinin keçirilməsinə sayılı günlər qalıb. Bu il bu müsabiqəyə ev sahibliyini ötən il Aleksandr Rıbakın təmsilçiliyi ilə birincilik qazanan Norveç həyata keçirəcək. Paytaxt Osloda 17000 tamaşaçı tutumu olan "Telenor Arena" mayın 15-dən etibarən iştirakçı ölkələrin üzünə açılıb.
Müsabiqənin rəsmi internet saytının yazdığına görə, 55-ci "Eurovision" müsabiqəsində təmsil olunacaq 39 ölkə təmsilçisinin ilk məşqinə ötən bazar günündən başlanılıb. Müsabiqənin təmsilçiləri artıq mayın 15-də Norveçin paytaxtı Osloya gəliblər. Təmsilçilərin məşqi mayın 23-dək davam edəcək. Bu il müsabiqəni həyata keçirən Norveçin "NRK" televiziyasının rəsmisi Peter Svaar artıq hazırlıqların başa çatmaq üzrə olduğunu qeyd edib. Onun sözlərinə görə, artıq "Telenor Arena"nın dekorasiyası tamamlanıb. NRK rəsmisinin sözlərinə görə, builki "Erovision"un həm yarımfinalları, həm də final konsertinin yüksək səviyyədə yayımlanması üçün ən son müasir texnologiyalardan istifadə olunub. Hər bir təmsilçinin iki açıq məşqi və jurnalistlərlə iki görüşü olacaq. Mətbuat konfransı zalı 700 nəfərlikdir.
Xəbərdə qeyd olunub ki, müsabiqə çərçivəsində ilk dəfə olaraq təmsilçilərin bir neçəsi fanatlarla görüş keçirməyə razılıq verib. Görüşlərdə fanatlar öz favoritləri ilə şəkil çəkdirmək, onlardan avtoqraf almaq şansı qazanacaqlar. "Eurovision-2010" müsabiqəsini işıqlandırmaq üçün çoxsaylı ölkələrdən Osloya səfər edəcək media mənsubları üçün artıq mətbuat mərkəzi tam hazırlanıb. Bu mərkəz 2000-dən artıq jurnalisti və 300-ə yaxın müsabiqənin fanatlarını qəbul etməyə tam hazırdır.
Qeyd edək ki, bu il 55 illik yubileyini qeyd edən "Eurovision" mahnı yarışmasının keçirilməsi ilə bağlı qərar 1955-ci ildə qəbul olunub. İlkin olaraq "Qran-pri Eurovision" adlanan müsabiqə, ilk dəfə 1956-cı il mayın 24-də Luqana şəhərində (İsveçrə) keçirilib. İlk müsabiqədə 7 Avropa ölkəsi iştirak edib. Müsabiqənin ilk qalibi İsveçrə təmsilçisi Liz Assia olub.
Yeri gəlmişkən, Azərbaycanın "Eurovision" müsabiqəsi üzrə rəsmi fanklubu olan "Ogae Azerbaiyan"ın rəsmi internet saytı istifadəyə verilib. "Ogae Azerbaiyan"ın vitse-prezidenti Ömər Əbdülkərimovun məlumatına görə, www.ogae.az ünvanında fəaliyyət göstərən bu sayt yüksək səviyyədə hazırlanıb, gözəl üslubda tərtib olunub. Saytın səhifələrində Azərbaycanın tarixi haqqında məlumatlar, "Eurovision -2010" müsabiqəsi ilə bağlı maraqlı xəbərlər yerləşdirilib. Rəsmi fan-klub istifadəyə verdikləri bu saytda "Azərbaycan Eurovision müsabiqəsində" mövzusunda da məlumatlar yerləşdirib. Saytda həmçinin Azərbaycanın builki müsabiqə təmsilçisi Səfurə Əlizadənin mahnılarını dinləmək və fotosessiyasını izləmək mümkündür. Hazırda sayt yalnız ingilis dilindədir, yaxın zamanlarda isə sayt daha iki dildə - Azərbaycan və rus dillərində fəaliyyət göstərəcək.
Onu da bildirək ki, artıq iştirakçı ölkələrin rəsmi fan-klubları onlara verilən səsvermə prosesini həyata keçiriblər. "Ogae Azerbaiyan" isə ən yüksək - 12 balı İsrailə verib. Azərbaycanın müsabiqə üzrə rəsmi fan-klubu 10 balı Almaniyaya, 8 balı Danimarkaya, 7 balı Xorvatiyaya, 6 balı Türkiyəyə, 5 balı Norveçə, 4 balı İslandiyaya, 3 balı Serbiyaya, 2 balı İsveçə, 1 balı isə Ukraynaya verib.
|
