Küveytdə çıxan "əl-Qəbəs" qəzeti ölkənin xüsusi xidmət orqanları tərəfindən İran İslam İnqilab Keşikçiləri Qvardiyasına ("sipah" da deyirlər) mənsub casus şəbəkəsinin aşkarlanması barədə bu günlərdə xəbər yaymışdı. Xəbərə əsasən, 7 nəfər tutulub. Onlar Küveytin Daxili İşlər və Müdafiə nazirliklərində çalışırmış.
Bu əhvalat Küveytdə ciddi rahatsızlığa səbəb olub. Küveyt parlamentinin üzvü Vəlid Təbatəbai deyib ki, Tehran hakimiyyəti bölgə dövlətlərinə, özəlliklə onun ölkəsinə qarşı düşmənçilik siyasəti yürüdür. Deputat dövlət hakimiyyətini İranın Küveytdəki casusluq və pozuculuq fəaliyyətinə qarşı ciddi tədbirlər görməyə çağırır. Deputatın sözlərinə görə, hakimiyyət susmağı və fəaliyyətsizliyi davam etdirərsə, o zaman onlar ölkə hökumətinə təzyiq göstərəcəklər.
Təbatəbai yerli KİV-ə müsahibəsində deyib ki, İran İslam Respublikasının onun ölkəsindəki casusluq əməllərinə qarşı hakimiyyətin atdığı addımlar qənaətbəxş deyil və onların susqunluğu anlaşılmır.
Xatırladaq ki, İran rəsmiləri casusluq fəaliyyəti ilə bağlı ünvanlarına səslənən ittihamları təkzib ediblər. Buna münasibət bildirən küveytli deputat Tehranın bu bəyanatını "təbii yanaşma" adlandırır. O, İran hakimiyyətinin ittihamları qəbul edib-etmədiyindən asılı olmayaraq, onların törətdiyi əməllərin "göz önündə" olduğunu qeyd edir.
"Bütovazerbaycanbirliyi" saytının yaydığı xəbərdə bildirilir ki, parlament üzvü İranın ölkəsindəki səfirinin Küveytdən çıxarılmasını tələb edərək deyib:
"İran böhran içindədir. Bununla belə onlar Ərəb körfəzi (ərəblər farsların "Fars körfəzi" dediyi ərazini belə adlandırır - S.S.) ölkələrinə və başqa qonşu dövlətlərə qarşı ərazi iddiası irəli sürür. Odur ki, bu iddiada olan hakimiyyətin qonşularının ərazisində casusluq fəaliyyəti göstərməsi də inkar oluna bilməz".
Onun sözlərinə görə, Tehranın bir çox ölkədə casus şəbəkəsi yaratması haqda təkzibedilməz faktlar var:
"Bu hakimiyyətin Livan, İraq, Yəmən, Misir, hətta müttəfiqi saydığı Suriyada casus şəbəkəsinin fəaliyyət göstərdiyinə dair çoxlu sayda məlumatlarımız var".
Küveytin ardınca Səudiyyə Ərəbistanı da İslam Respublikasını eyni suçda ittiham edib. "Amerikanın səsi" radiosunun ərəbcə redaksiyasının məlumatında bildirilib ki, mayın 7-də Səudiyyə Ərəbistanı daxili işlər naziri Məlik Naib bin-Əbdüləziz məsələ ilə bağlı verilmiş bəyanatların doğruluğunu təsdiqləyərək, şəbəkənin açıqlanması və çökdürülməsini Küveyt təhlükəsizlik xidmətinin "böyük uğuru" kimi dəyərləndirir.
Ötən gün körfəz ölkələri (İrandan başqa) təhlükəsizlik xidməti rəhbərlərinin toplantısı keçirilib. Yığıncaqda İran casuslarının həbsi ilə bağlı Küveyt mətbuatının məlumatı rəsmi şəkildə təsdiqlənib.
|
