Bacısını öldürməkdə təqsirləndirilən Astara rayon sakininin cinayət işi üzrə məhkəmə prosesi başa çatıb. Ağır Cinayətlərə Dair İşlər üzrə Məhkəmənin hakimi Ələkbər Quliyevin sədrliyi ilə keçirilən prosesdə təqsirləndirilən Sevman Ramazanova hökm oxunub. Hökmə əsasən, Sevman Ramazanov 9 il müddətinə azadlıqdan məhrum edilib.
Astara rayon sakini, 1985-ci il doğumlu Sevman Rəhman oğlu Ramazanov doğma bacısını öldürməkdə ittiham olunur.
İstintaqla müəyyən edilib ki, S.Ramazanov 2006-cı ildə Əzizbəyov rayonu, Türkan qəsəbəsində yaşayan bacısı, 1984-cü il doğumlu İradə Ramazanovanı namus üstündə boğaraq qətlə yetirib. Sonra isə onun meyitini digər bacısı Pərvanə Ramazanovanın həyətində basdırıb. Hadisədən bir il sonra S.Ramazanov izi itirmək məqsədi ilə bacısının meyitini torpaqdan çıxardaraq, Türkan qəsəbəsi ərazisində yerləşən zibilliklərin birində yandırıb. Hadisə yerinə baxış keçirən əməliyyatçılar oradan meyitin qalıqlarını aşkar edərək götürüblər.
Məhkəməyə və ibtidai istintaqa ifadəsində S.Ramazanov bacısını yüngül həyat tərzi keçirdiyi üçün öldürdüyünü bildirib. Onun sözlərinə görə, hələ hadisə baş verməzdən əvvəl valideynləri də bu əməllərinə görə İradə Ramazanovadan imtina edib.
|
