Samir Piriyev qəzet yazarının hekayəsini canlandırıb

Son aylar türk şou-biznesində yerini tutmağa səy göstərən müğənni Samir Piriyev sənətçi üçün vacib olan albom və klip işini tamamlayıb. Bunları əvvəlcə Türkiyə mediası üçün təqdim edən sənətçinin daha bir təqdimatı ötən gün paytaxtda keçirildi. Özü ilə "TRT 1"in rejissoru Fateh bəyi də Bakıya qonaq qismində gətirən Samir Piriyev əsas çıxışları onun öhdəsinə buraxdı. Fateh bəy bildirdi ki, əslində Samir Piriyevi Türkiyəyə çəkib aparmaq bir o qədər asan olmayıb:

"Bizim telekanal "Sən türkülərini söylə" musiqi müsabiqəsinin növbəti turunu keçirəndə heyətimiz Samiri ora dəvət etdi. Amma baxdıq ki, Samir naz edir. TRT-nin Bakı təmsilçiliyindən xahiş etdik ki, onun qulağından və əlindən tutub təyyarəyə mindirsin və Türkiyəyə yola salsın. Əks təqdirdə onu bura gətirmək çətin olacaq. Gəldi və qısa zamanda türk dinləyicisinin qəlbinə mahnıları ilə yol tapa bildi".

TRT təmsilçisi əlavə edir ki, Samir Piriyevin istedadı müəyyən bir heyəti onunla işbirliyini davam etdirməyə sövq edib. Artıq hazır məhsul kimi təqdimata çıxarılan "Affet qürurum" adlı albom və bir yeni klip Samirin bu istiqamətdə görülən ilk işlərindən sayılır. Albomda sənətçini 70 nəfərdən ibarət canlı ansambl müşayiət edib. Burada məşhur türk sənətçilərindən Zərrin Özər və Nuray Hafiftaşla duet də yer alıb. Lakin Fateh bəy duetlərin sayını məhdudiyyətə endirərək, azərbaycanlı sənətçini duet ortaqlarının kölgəsində qoymaq niyyətinin olmadığını bildirdi.

Klipə gəlincə, çəkilişlər Türkiyənin məşhur qəzet yazarı Ayşe Armanın sevgilisinin vaxtilə onun üçün aldığı köşkdə çəkilib. Onlar ayrıldıqdan sonra sevgilisi həmin evə gəlir və xatirələrini təzələyir. Samirin də klipi təxminən belə bir ssenari üzərində qurulub. Amma Ayşe xanımdan fərqli olaraq, klipdə Samir sevgilisini itirən bir cavanın obrazını yaradıb.

Söhbətinə davam edən Fateh bəy bildirdi ki, Samir Piriyev üçün Türkiyədə piar kampaniyası aparılır. Bunlardan biri olaraq, bu günlərdə Boğaz körpüsünün müdiriyyətinin razılığı alınandan sonra müğənninin 700 sayda albomu avtomobil sürücülərinə hədiyyə edilib. Yaxın günlərdə isə azərbaycanlı sənətçinin konsert proqramlarına start veriləcək. Hazırda klipi türk kanallarında yayımlanan Samir Piriyev həm də televiziyalara dəvətlər alır.