Bu ay Osloda "Eurovision-2010" mahnı müsabiqəsində iştirak edəcək 39 ölkədən 20-nin təmsilçisi qadın sənətçilərdir. Müsabiqənin rəsmi saytının yazdığına görə, hər il ənənəvi olaraq keçirilən "Eurovision müsabiqəsinin ən gözəl qadın iştirakçısı" sorğusuna artıq start verilib. Siyahıda təmsilçimiz Səfurə Əlizadənin də adı var.
Cəsvermədə təmsilçimiz bu sorğunun hələ ki favoritlərindən biridir. Favorit gözəllər sırasında Azərbaycanla yanaşı Xorvatiya, Finlandiya, Gürcüstan, Ermənistan, Danimarka və digər ölkələrdən olan qadın sənətçilərin adı var. Xatırladaq ki, ötənilki sorğuda azərbaycanlı Aysel Teymurzadə ən gözəl təmsilçi seçilmişdi. Saytın yazdığına görə, ən çox səs toplayan iştirakçının adı yaxın günlərdə bəlli olacaq.
Yeri gəlmişkən, Azərbaycanın "Eurovision-2010" mahnı müsabiqəsindəki təmsilçisi Səfurə Əlizadənin promo-tur çərçivəsində Yunanıstanın paytaxtı Afinaya nəzərdə tutulan səfəri təxirə salınıb. S.Əlizadənin rəsmi internet saytının yazdığına görə, buna səbəb Afinada yaşanan siyasi və sosial problemlərdir. Xəbərdə bildirilib ki, bu günlərdə həyata keçirilməsi nəzərdə tutulan səfər çərçivəsində təmsilçimizin Yunanıstanın radio-şousunda, məşhur televiziya verilişlərində, eləcə də Yunanıstanın 55-ci "Eurovision" müsabiqəsindəki təmsilçisi George Alkaiosla görüşü də nəzərdə tutulurdu. Səfurə Əlizadə və onun komandası bu səfərin baş tutmamasından təəssüfləndiklərini bildirir və bu hadisələr səbəbincə Afinaya səfər edə bilməyəcəklərini açıqlayırlar.
Təmsilçimiz Yunanıstan səfərinin onun promo-turu üçün çox vacib bir ölkə olduğunu da etiraf edir. Təmsilçimiz ümid edir ki, müsabiqədən sonra Yunanıstana səfər arzusu reallaşacaq. Səfurə Əlizadənin promo-turu daha intensiv olacaq. Yaxın günlərdə İsveçrə, Polşa və Rusiyaya yollanacaqdır.
|
