Dünən paytaxtın Nərimanov rayonunda "Qardaşlıq məzarı"nın yerləşdiyi ərazidə düzənlənən anım mərasimində MDB ölkələrinin Azərbaycandakı səfirlikləri də iştirak edirdi. Böyük Vətən müharibəsində həlak olanların şərəfinə ucaldılmış abidə önündəki bu mərasim Nərimanov rayon İcra Hakimiyyəti tərəfindən təşkil olunmuşdu.
Alman faşizmi üzərində qələbənin 65 illiyinə həsr olunmuş anım mərasimində çıxış edən 101 yaşlı veteran Qaraş Qasımov bildirib ki, Azərbaycan müharibə dövründə SSRİ-də hərbi texnika üçün yanacaq istehsal edən yeganə respublika olub. Azərbaycan ərazilərinin 20 faizinin Ermənistan tərəfindən işğal olunduğunu xatırladan veteran ordumuzun müasir silahla silahlandığını, Azərbaycan əsgərlərinin Böyük Vətən müharibəsində babalarının göstərdiyi şücaəti təkrar edəcəyinə əmin olduğunu bildirib.
Millət vəkili Mixail Zabelin müharibənin böyük fəlakətlər gətirdiyini, milyonlarla insanın ölümünə səbəb olduğunu deyib. O, Azərbaycan ərazilərinin Ermənistan tərəfindən işğal olunmasını SSRİ ərazilərinin faşistlər tərəfindən zəbt olunması ilə müqayisə edib: "Düşünürəm ki, faşistlər SSRİ-ni ala bilmədikləri kimi, Ermənistan da öz niyyətinə çatmayacaq, Azərbaycan xalqı öz ərazilərini geri qaytaracaq".
Tədbirdə MDB ölkələrinin səfirləri adından çıxış edən Rusiya səfiri Vladimir Doroxin ölkəsi ilə Azərbaycanın keçmişin qiymətləndirilməsində vahid mövqedən çıxış etdiyini bildirib. Səfir Azərbaycanın faşizm üzərində qələbəyə verdiyi töhfənin əvəzsiz olduğunu vurğulayıb:
"Bakı, Bakı nefti olmadan sovet xalqı faşizm üzərində qələbə çala bilməzdi". Daha sonra jurnalistlərin "nədən Bakıya "Qəhrəman şəhər" adı verilməyib?" sualını cavablandıran səfir açıqlamasında qeyd edib ki, Bakıya "Qəhrəman şəhər" adının verilməməsi böyük tarixi ədalətsizlikdir". Bununla belə, diplomat bu səhvi düzəltməyin artıq mümkün olmadığını bildirib:
"Çünki "Qəhrəman şəhər" adını Sovetlər İttifaqı verirdi. Sovetlər İttifaqı isə süqut etdiyindən bu, artıq mümkün deyil. Hazırda Rusiya öz şəhərlərinə "Döyüş şöhrəti şəhəri" adı verir. Qələbənin 65 illiyi münasibətilə prezident Dmitri Medvedyev 5-6 şəhərə "Döyüş şöhrəti şəhəri" adı verib. Lakin Azərbaycan suveren dövlət olduğundan bizim onun hansısa şəhərinə hansısa ad vermək hüququmuz yoxdur".
Qeyd edək ki, tədbirin sonunda müharibə veteranlarına Qələbənin 65 illiyi münasibətilə yubiley medalları təqdim olunub, abidənin önünə əklillər, əsgərlərin qəbirləri üzərinə çiçəklər qoyulub.
|
