"Perspektivdə Şimali Atlantika Alyansının qloballaşma ehtimalı böyükdür. Bu, uzaq perspektivdə ola bilər, lakin günün birində NATO Demokratik Təhlükəsizlik Müqaviləsi Təşkilatına çevrilərsə, mənim üçün gözlənilməz olmaz". Bunu "Ayna"nın Azərbaycan - NATO ilə əməkdaşlığının perspektivləri barədə sualına cavab olaraq Azərbaycan - Atlantika Əməkdaşlıq Assosiasiyasının sədri Sülhəddin Əkbər bildirib. Onun sözlərinə görə, məsuliyyət və fəaliyyət məkanı qloballaşdıqca NATO da qloballaşma zorunda qalacaq. Ekspert qeyd edib ki, bu gün artıq alyans öz sərhədlərindən kənarda Balkanlardan (Bosniya, Kosovo, Makedoniya) Mərkəzi Asiyaya (Əfqanıstan), Afrikaya (Darfur) və Orta Şərqədək (İraq) çox geniş bir çoğrafiyada sülhün qorunması və dəstəklənməsində mühüm rol oynayır. Eyni zamanda universal demokratik dəyərləri bu coğrafiyalara daşıyır.
Ekspert deyir: "Mövcud qlobal və regional təhlükəsizlik şəraiti və balaca inkişaf meyilləri qlobal demokratik təhlükəsizlik məkanının formalaşdırılması istiqamətində aktiv siyasət aparılmasını diqtə edir". Onun fikrincə, yeni Avropa təhlükəsizlik məkanı bu qlobal məkanın mərkəzində olmaqla bərabər, ilk növbədə Asiyanın Yaponiya və Cənubi Koreya kimi inkişaf etmiş demokratik ölkələri, Avstraliya və Yeni Zelandiya da bura daxil edilməlidir.
S.Əkbər hesab edir ki, ABŞ və Avropadan olan müttəfiqləri, xüsusən də Fransa və Almaniya qlobal miqyasda, o cümlədən postsovet məkanında demokratiya, sabitlik və təhlükəsizlik məkanının genişləndirilməsi məsələsində səylərini birləşdirməli, əlaqəli hərəkət etməli və bütün Avroatlantik resurslardan səmərəli istifadəyə imkan verən vahid strategiya işlənib hazırlanmalıdır.
"Bunun üçün də ən uyğun yer NATO-dur. Alyansın hazırlanmaqda olan yeni strateji konsepsiyasının bu tələblərə nə dərəcədə cavab verəcəyini yaxın perspektivdə birlikdə görəcəyik. Alyansın postsovet məkanına, eyni zamanda Cənubi Qafqaza yönəlik siyasətinə ciddi korrektələr edilməlidir" - S.Əkbərin fikrincə, Gürcüstan böhranından sonra yeni şəraitin yarandığı, onsuz da xarici təsirlərə açıq və həssas olan Cənubi Qafqazda konfliktlərin həlli, demokratiyanın inkişafı, sabitlik və təhlükəsizliyin təmini üçün region ölkələrinə güclü dəstək verilməlidir.
"Gürcüstan Rusiya qarşısında yalnız buraxılmamalı, onun alyansa üzvlüyünə süni əngəllər aradan qaldırılmalı və bu qürurlu kiçik ölkə hərtərəfli dəstəklənməlidir" - S.Əkbər bildirdi ki, dəyişən regional şərait və rəsmi Bakının NATO-ya üzvlüyə hazır olmaması nəzərə alınmalı, IPAP gücləndirilərək MAP-a maksimum yaxınlaşdırılmalı və Azərbaycan NATO ilə gücləndirilmiş tərəfdaşlığa cəlb edilməlidir.
Onun fikrincə, Azərbaycana yönəlik bu siyasət alyansın üzvü olan ABŞ və Türkiyə ilə strateji tərəfdaşlıq və AB ilə assosiativ üzvlük siyasəti ilə də dəstəklənərsə, yaxın perspektiv üçün səmərəli olar.
"Azərbaycan da öz növbəsində, artıq vaxt itirmədən Milli Təhlükəsizlik Konsepsiyasında göstərdiyi kimi, Avroatlantik məkana inteqrasiyanı başlıca strateji hədəf kimi göstərməklə öz Hərbi Doktrinasını və Xarici Siyasət Konsepsiyasını da qəbul etməli, gücləndirilmiş tərəfdaşlığa keçməklə alyansla əlaqələrini inkişaf etdirməli, yuxarıda qeyd edildiyi istiqamətlərdə ABŞ, AB və Türkiyə ilə münasibətlərini keyfiyyətcə yeni səviyyəyə qaldırmalıdır", - deyə o bildirdi.
|
