Milli Kitab Mükafatı qaliblərinin adları mayın 23-də bəlli olacaq. Bu barədə layihənin təsisçisi, "Əli və Nino" Kitab Evinin rəhbəri Nigar Köçərli danışıb. Xatırladaq ki, əslində mərasim mayın 1-də keçirilməli idi. Lakin sonradan mükafatın sponsorları layihəyə xüsusi önəm verdikləri üçün mükafatlandırma mərasimini daha orijinal təşkil etmək səbəbindən tədbirin mayın sonuna keçirilməsi qərara alınıb:
"Qeyd edim ki, qiymətləndirmə prosesi 10 şkalalıq bal sistemi ilə aparılacaq. Münsiflər heyətindən bəzi nümayəndələr artıq əsərlərlə bağlı ümumi fikirlərini mətbuata açıqlayıblar. Bəziləri susmağa üstünlük verir və bunu obyektivliyin qorunması ilə əlaqələndirirlər. Təsisçi olaraq, onların fikirləri ilə mütəmadi maraqlanıram".
Nigar Köçərlinin əlavəsinə görə, onluqdakı müəlliflərin əsərləri ilə bərabər 10 ballıq sistem üzrə qiymətləndirməyə şərait yaradan bülletenlər artıq münsiflər heyətinə təqdim edilib. Onlar əsərləri oxuyub və hər əsər üzrə ballarını bülletendə qeyd edəcəklər.
"Ən çox bəyəndikləri əsərə 10 bal, heç bəyənmədiklərinə isə 1 bal verə bilərlər. Sonra 10 əsər üzrə səsvermə nəticələri konvertə qoyulub bizə göndərilir. Anonimlik qorunacaq ki, obyektivlik təmin olunsun. Kimin hansı əsərə neçə bal verməsi isə yalnız Təşkilat Komitəsinə və sponsorlara bəlli olacaq. Artıq bəzi münsif üzvləri öz cavablarını təqdim ediblər. Digərləri isə bunu mayın 23-də müəyyən edəcək və qaliblərin adı bəlli olacaq" - deyə N.Köçərli bildirdi.
Layihənin təsisçisi qeyd edir ki, mayın 23-də tədbirə indiyədək adı gizli saxlanılan Ekspertlər Şurası dəvət olunacaq və adlar açıqlanacaq. Nigar xanım siyahıya adı düşən 10 müəllifin əsərlərinin nəşri prosesinin yaxşı təşkil olunduğunu da bildirdi:
"Əsərləri almanax şəklində çap etməyi düşünürdük. Lakin sonradan nəşrin çox qalın alınacağını nəzərə alıb hər müəllifin kitabını ayrı-ayrılıqda nəşr etmək qərarına gəldik. Yəqin, bu qərar müəlliflərin də ürəyincə olacaq. Biz bununla hansı kitabın daha çox satılacağını müəyyən edə biləcəyik".
Sonda N.Köçərli bildirdi ki, hazırda müəlliflərlə müqavilələrin bağlanma prosesi gedir. Sürpriz olaraq onu da sözünə əlavə etdi ki, müəlliflərə qonorarla yanaşı, həm də kitabların satışından müəyyən faiz veriləcək.
|
