Azərbaycan İstiqlal Muzeyinin ekspozisiyasında Qələbənin 65 illiyi ilə əlaqədar "Tarixin ibrət dərsləri" adlı tədbir-sərgi təşkil olunub. Bu barədə muzeyin mətbuat əlaqələndiricisi məlumat verib. Xəbərdə bildirilir ki, sərgidə muzeyin fondunda saxlanılan sənədlər, rəsm əsərləri, plakatlar, Sovet İttifaqı qəhrəmanları H.Aslanovun, M.Hüseynzadənin, S.Kazımovun, İ.Məmmədovun, M.Quliyevin şəxsi əşyaları və Azərbaycan dövlət kino-foto sənədlər fondundan verilən şəkillər nümayiş olunub.

Qeyd edək ki, sərgi üç hissədən ibarət olub - Azərbaycan 1941-45-ci illər müharibəsində, Azərbaycanın Qızıl Ulduzları, 1941-45-ci illər müharibəsini əks etdirən plakatlar və rəsm əsərləri. Məlumatda bildirilib ki, tədbirdə mədəniyyət və turizm naziri Ə.Qarayev, İstiqlal Muzeyinin direktoru F.Şəmsi, Sovet İttifaqı Qəhrəmanı Mehdi Quliyevin oğlu S.Quliyev, Mehdi Hüseynzadənin bacısı oğlu M.Əzizbəyov və digər qonaqlar çıxış ediblər.

Tədbirdə 1941-45-ci illər müharibəsinin veteranları, Belarus və Rusiya səfirliklərinin nümayəndələri, qəhrəmanların qohumları, Prezident Qvardiyasının və Daxili Qoşunların əsgərləri və digər qonaqlar iştirak ediblər.