Dünən Qaradağ rayon Məhkəməsində həbsdə olan jurnalist Eynulla Fətullayev barəsində başlanan cinayət işi üzrə növbəti məhkəmə prosesi keçirilib. APA-nın xəbərinə görə, hakim İsmayıl Xəlilovun sədrliyi ilə keçirilən prosesdə E.Fətullayevin saxlandığı 12 saylı Cəzaçəkmə Müəssisəsinin rejim-nəzarət şöbəsinin rəisi Anar Əhmədov, müəssisə rəisinin köməkçisi Famil Salmanov və müəssisənin baş nəzarətçisi Fərman Salmanov şahid qismində ifadə veriblər.
Onlar E.Fətullayevi ziyalı və özündən razı bir şəxs kimi xarakterizə ediblər. A.Əhmədov və digər şahidlər E.Fətullayevin üzərindən narkotik vasitə götürülməsi əməliyyatı barədə məhkəməyə ətraflı məlumat veriblər. Proses mayın 4-də davam etdiriləcək.
Qeyd edək ki, "Gündəlik Azərbaycan" və "Realnıy Azerbaydjan" qəzetlərinin sabiq baş redaktoru Eynulla Fətullayev 2007-ci il aprelin 20-də həbs edilib. Jurnalist 2005-ci ildə qələmə aldığı "Qarabağ gündəliyi" adlı silsilə yazılarında xocalıları təhqir etməkdə günahlandırılıb və ona 2 il 6 ay həbs cəzası verilib. Tutulandan sonra ona əlavə ittihamlar irəli sürülüb və jurnalist 2007-ci il oktyabrın 30-da 8 il 6 ay müddətinə azadlıqdan məhrum edilib.
2009-cu il dekabrın 30-da isə 12 saylı Cəzaçəkmə Müəssisəsində saxlanılan E. Fətullayevin üzərində guya 0,223 qram həcmində heroin aşkarlanıb. Bununla əlaqədar olaraq ona qarşı Qaradağ RPİ-nin istintaq şöbəsində Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi qaldırılıb.
İş üzrə təyin edilmiş məhkəmə-bioloji-kimyəvi ekspertizasının rəylərinə görə, istintaq zamanı E.Fətullayevdən götürülmüş qan və sidik nümunələrində diasetilmorfi (heroin), amfetaminil narkotik vasitələri və flunitrozepam-M psixotrop maddəsi aşkar edilib. Göstərilənlərlə yanaşı, məhkəmə-narkoloji ekspertizasının rəyinə görə, təqsirləndirilən şəxs E. Fətullayevdə narkotik vasitə olan diasetil-morfi (heroin), amfetaminil və psixotrop dərman vasitəsi olan benzodiazepindən istifadə etmə halları olub, lakin müayinə zamanı narkomaniya xəstəliyindən əziyyət çəkməməsi baxımından E. Fətullayevin narkomaniyadan məcburi müalicəyə ehtiyacı yoxdur. E.Fətullayevin narkotik vasitələr və psixotrop maddələrdən istifadə etmə halları nəzərə alınaraq narkoloji profilaktik qeydiyyata alınması məsləhət görülüb.
|
