Bakıda dünyanın tanınmış şahmatçılarının iştirakı ilə "Prezident kuboku" uğrunda beynəlxalq turnir başlanıb. İştirakçılar əvvəlcə rapid partiyalarda, daha sonra isə blits turnirdə qüvvələrini sınayacaqlar.
Mərhum prezident Heydər Əliyevin xatirəsinə həsr olunmuş turnir hələ ötən ildən keyfiyyətcə yeni səviyyəyə qalxıb. Turniri daha çox Azərbaycanın ən güclü şahmatçıları ilə dünya yığma komandasının qarşıdurması kimi də xarakterizə etmək olar.
Turnir iştirakçıları baxımından xeyli sanballıdır - keçmiş dünya çempionu Vladimir Kramnik (Rusiya), dünya kubokunun keçmiş qalibi Qata Kamski (ABŞ), keçmiş bakılı, indi isə İsrail yığmasının kapitanı Emil Sutovski (İsrail) və nahayət, Yudit Polqar (Macarıstan). Sonuncu iştirakçı zərif cinsin nümayəndəsi olsa da, bir qayda olaraq kişilər arasında mübarizə aparır və dünyanın ən güclü qrossmeysterlərindən hesab olunur.
Bu şahmatçılara qarşı ölkəmizin ən tanınmış zəka sahibləri - Teymur Rəcəbov, Şəhriyar Məmmədyarov, Rauf Məmmədov və Qədir Hüseynov çıxış edirlər. Rapid-turnir yeddi turdan ibarətdir. Şahmatçılar daha sonra blits-turnirdə qüvvələrini sınayacaqlar və həmin yarışlarda adını çəkdiyimiz şahmatçılara daha bir neçəsi qoşulacaq.
Yarışların sonuncu günü V.Kramnik, Q.Kamski, E.Sutovski, Y.Polqar, eləcə də ölkəmizin aparıcı şahmatçıları Sahil bağında 87 lövhədə birseanslı oyunlar keçirəcəklər.
Yarışlarda artıq iki tur arxada qalıb. Birinci turda Şəhriyar Məmmədyarov Yudit Polqara qalib gəlib. Qalan iştirakçılarımız isə uduzublar. Rauf Məmmədov Vladimir Kramnikə, Qədir Hüseynov Emil Sutovskiyə, Teymur Rəcəbov isə Qata Kamskiyə məğlub olub.
İkinci turda isə bu nəticələr qeydə alınıb:
Y.Polqar - T. Rəcəbov - 0,5:0,5; R.Məmmədov - Q.Hüseynov - 0,5:0,5; Q.Kamski - E.Sutovski - 0,5:0,5; Ş.Məmmədyarov - V.Kramnik - 1:0.
İki turdan sonra Şəhriyar Məmmədyarov turnirə başçılıq edir.
|
