Mayın 22-də Azərbaycan Dövlət Akademik Opera və Balet Teatrında Azərbaycan, Ukrayna və Gürcüstanın opera sənəti ulduzlarının iştirakı ilə Cüzeppe Verdinin "Aida" operasının tamaşası olacaq. Teatrın mətbuat xidmətindən bildirildiyinə görə, tamaşada Aida partiyasını Ukrayna Dövlət Akademik Opera və Balet Teatrının aparıcı solisti, Ukraynanın əməkdar artisti Viktoriya Çenskaya ifa edəcək.
Qeyd edək ki, V.Çenskaya Danimarka, Hollandiya, Almaniya, İspaniya, Fransa, İngiltərə və İtaliyada uğurlu qastrol səfərlərində olub. Finlandiyanın Helsinki şəhərində keçirilən beynəlxalq opera sənəti festivalında o, Aida partiyasının ən yaxşı ifaçısı üçün təsis edilmiş xüsusi prizə layiq görülüb. Xəbərdə bildirilir ki, teatr rəhbərliyi Radames partiyasını ifa etmək üçün Gürcüstan Dövlət Akademik Opera və Balet Teatrının solisti, Gürcüstanın xalq artisti və dövlət mükafatı laureatı, professor Teymuraz Ququşvilini dəvət edib. Əsas partiyalardan biri - Amnerisi isə Azərbaycanın əməkdar artisti Fidan Hacıyeva ifa edəcək. Bundan başqa, tamaşada Azərbaycanın vokal ustaları, əməkdar artistlər, vokalçıların Bülbül adına I Beynəlxalq müsabiqəsinin Qran-Pri mükafatçısı Əli Əsgərov və vokalçıların İtaliyada keçirilən beynəlxalq müsabiqəsinin diplomantı Əkrəm Poladov da çıxış edəcəklər.
|
