Kubanın Gibara şəhərində "VIII Festival Internasional Del Sine Pobre" kinofestivalı keçirilib. Festivalda ölkəmizi "Dərviş" Prodüser Mərkəzinin istehsalı olan "Düyün" filmi təmsil edib. Bu barədə qəzetimizə Prodüser Mərkəzindən bildirilmişdir. Qeyd edək ki, Almaniya, Kuba, Çili, İtaliya və İspaniyanın qatıldığı builki festivalda "Düyün" filmi jürinin xüsusi mükafatına ("MENCION ESPECIAL DEL YURADO") layiq görülüb. Bu, "Düyün" filminin artıq 4-cü beynəlxalq mükafatıdır. Daha öncələr bu ekran əsəri "Rahmat International Film Festival" (İran) "Ən yaxşı bədii film" və "Didor" Beynəlxalq kinofestivalında (Tacikistan) "Ən yaxşı qısametrajlı film" və "Ən yaxşı musiqi həlli" nominasiyalarında qalib olub. Arayış üçün bildirək ki, "Düyün" filmi Mədəniyyət və Turizm Nazirliyinin keçirdiyi "Bu meydan, bu ekran" layihəsi çərçivəsində, "Buta Film", "Azərbaycan Gənc Film İstehsalçıları Assosiasiyası" və "24K" kinoatelyesinin dəstəyi ilə "Dərviş" Prodüser Mərkəzində çəkilib. Filmin ssenari müəllifləri Asif Rüstəmov və Ramiz Fətəliyevdir. Quruluşçu operator Adil Abbasov, rəssam Əziz Məmmədov, ikinci rejissor Çingiz Həsənov, bəstəkar isə Xəyyam Mirzəzadədir. Baş rolları Mehriban Zəki və Pərviz Məmmədrzayev oynayıblar.
|
