Bu gün aramızda elələri var ki, gündəlik həyatını falsız təsəvvür etmir. Astroloji proqnoza, tək səbrin düşər-düşməzliyinə, nalın xoşbəxtlik nişanəsi olduğuna, üzərliyin gözdəyməni dəf etdiyinə, müxtəlif amuletlərin faydasına çoxları inanır. Hesablamalara görə, dünya əhalisinin 20 faizi işini qoroskopla qurur. Eskpertlər bunun səbəbini insanların bir-birinə inamının azalmasında və hər bir hərəkət üçün kimdənsə məsləhət almaq ehtiyacında görür.

Özlərini ekstrasens, cindar adlandıran xeyli sayda şəxslər isə insanların bu kimi inanclarını istismar edərək, taleyi öncədən bildiklərini, sağalmaz xəstəliklərə şəfa verdiklərini iddia edirlər. Onlar elanlar verir və bu yolla xeyli sayda müştəri toplayırlar. Çoxu adicə şarlatan olan belələri telekanalları yağır ediblər. Telekanalların "falçıxana" verilişlərində bu "sənət"in nümayəndələrinə fırıldaqlarını ustalıqla millətə sırımaq üçün geniş imkan verilir. Hətta "ekstrasenslər" birbaşa yayımlanın verilişlərə dəvət olunur və telefon vasitəsilə millətin "falına baxırlar". Nəticədə əhalinin böyük qismi öz taleyini bu kimi "işbazlar"ın ixtiyarına buraxıb onlardan kömək umur.

Nə isə, Gəncə şəhərində də falçılar az deyil. Onlardan biriylə görüşməyi və "gələcəyimizi öyrənməyi" qərara aldıq. Müsahib əvvəlcə tərəddüd etdikdən sonra öz "sənəti və istedadı" haqda danışmağa razılıq verdi. Bu baxıcı xanım oyun kartları vasitəsilə fal açır. Şəhərdə onu yetərincə tanıyırlar və kifayət qədər müştərisi var. Falçı Günayın (ad şərtidir) "iş stolu"nun üstündə 2 balıqqulağı, dəniz ulduzu və xırda metal pullar diqqəti cəlb edir. Yanına gələnlərin ürəklərindən keçəni guya balıqqulağı vasitəsilə eşidir və dəniz ulduzu ilə Allahla təmasa girərək həmin insanlara "xeyir-dua" verir.

REKLAM

---

---

Söhbət əsnasında isə bəlli oldu ki, əvvəllər başqa işlə məşğul olurmuş:

"Mən Rusiyada qızıl alverçisi olmuşam. Baxıcılığı da orada müştərim olan ekstrasens bir qadından öyrənmişəm. Hər kəs bu sənətin sirlərini öyrənə bilməz. Bunun üçün xüsusi istedad olmalıdır. Məndə belə bir qüvvə mövcuddur. Yuxuda mənə deyilib ki, sən falçılıqla məşğul olmalısan".

Gileyləndi ki, "son vaxtlar milləti aldadan fırıldaqçı baxıcıların sayı çoxalıb". Fürsətdən istifadə edib Günaydan falımıza baxmağı xahiş etdik. Təsəvvür edin, söylədiyi 10 cümlədən 1-i belə düzgün çıxmadı. Amma sağ olsun, gördüyü işin müqabilində pul almadı. Sağollaşanda öz vizit kartını təqdim etdi. Kassa aparatı da olsa, fəaliyyəti tam leqal olardı.

"Bunlar məqsədyönlü şəkildə, insanları cəhalətə sürükləmək məqsədilə təbliğ olunur"

Gəncə Dövlət Universitetinin dosenti Vahid Cəlilov deyir ki, bu məsələlər bilərəkdən, xüsusən KİV vasitəsilə gündəmdə tutulur:

"Falçılıq, cadugərlik, ekstrasenslik məqsədyönlü şəkildə, insanları cəhalətə sürükləmək üçün geniş təbliğ olunur. Çünki cahili idarə etmək aqili idarə etməkdən daha asandır. Bir əsr öncə Şeyx Nəsrullah bir kəndi aldada bilirdisə, indi nəsrullahlar texnikanın köməyi ilə bütün ölkəni, dünyanı aldadır".

Doğrudur, dünyanın hər yerində bu işlə məşğul olan şəxslər və qruplar var, lakin onlar cəmiyyətə bizdəki qədər nüfuz edə bilmirlər. Hətta bəzi ölkələrdə falçılıqla məşğul olan insanların məsuliyyətə cəlb olunması haqda qanunlar qəbul edilib. Məsələn, Tacikistanda 1985-ci ildə qəbul olunmuş, 2007-ci ildə isə əlavə və dəyişikliklər edilmiş qanuna əsasən, bu işlə məşğul olanlar minimum əməkhaqqının 30-40 misli, ikinci dəfə təkrarlanarsa, 50-70 mislinədək cərimələnir. İranda isə sözügedən qanun 2006-cı ildə qəbul edilib. V.Xəlilov əlavə etdi:

"Çox təəssüf ki, Azərbaycanda belə qanun layihəsi yoxdur. Bu qanunun qəbul olunmamasında müəyyən qrup insanların maraqları var. Peyğəmbərimiz (s.a.s) belə bir kəlam söyləyib: "Milləti dövlət tərbiyələndirir". Əlbəttə, bir çox dünya ölkələrində qara və ağ magiya ilə, müxtəlif sehrlə məşğul olan insanlar mövcuddur. Onların çox populyarlaşmamasının səbəbi həmin ölkələrdə cəmiyyətin intellekt səviyyəsinin yüksək olmasıdır".

"Falçılığın İslamla heç bir əlaqəsi yoxdur və belə insanlar şeytana qulluq edir"

Baxıcıların bəziləri fala Quran vasitəsilə baxırlar. Onlar özlərinə haqq qazandırmaq üçün iddia edirlər ki, guya bu bir vergidir və Allah tərəfindən vəhylə göndərilib. Lakin müqəddəs kitabda falçılıq birmənalı olaraq qadağan edilir. Dinimizə görə, falçı yanına gedən bu işlə məşğul olan qədər günah qazanır.

Vaxtilə Şahsevərlər məscidinin imamı olmuş Hacı İlham deyir ki, Falçılığın dinimizlə heç bir əlaqəsi yoxdur. Bu işlər şeytan əməlidir. Müqəddəs kitabda bununla bağlı xeyli dəlillər var və azca İslamdan xəbəri olan falçı yanına getməz.