Dövlət Baytarlıq Xidmətinin rəisi İsmayıl Həsənov aprelin 22-də vəzifəsindən azad olunub. Bu barədə Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev məlumat verib. Onun sözlərinə görə, İ.Həsənov nazirliyin kollegiyasının qərarı ilə tutduğu vəzifədən kənarlaşdırılıb.
M.Hacıyev İ.Həsənovun vəzifədən azad olunma səbəblərini də açıqlayıb. Nazirliyin sözçüsü bildirib ki, İ.Həsənovun vəzifəsindən azad edilməsinin səbəblərindən biri Dövlət Baytarlıq Xidməti rəisinin "Aqrolizinq" ASC tərəfindən xaricdən Azərbaycana gətirilən cins düyələrdə baş verən fəsadların aradan qaldırılmasına laqeyd münasibət bəsləməsidir. Buna görə KTN kollegiyasının qərarı ilə 2009-cu il sentyabrın 4-də İ.Həsənova xəbərdarlıq edilməklə şiddətli töhmət verilməsinə baxmayaraq, heç bir nəticəsi olmayıb. İkinci səbəb isə İ.Həsənovun vəzifə səlahiyyətlərini aşaraq, baytarlıq qanunvericiliyinə zidd olmaqla brusellyoz xəstəliyinə qarşı yeni müalicə preparatı yaratması barədə dezinformasiya yayması olub.
M.Hacıyev onu da bildirib ki, kütləvi informasiya vasitələrində bununla bağlı yayılan xəbər xaricdə də rezonans yaradıb. Lakin elmi-tədqiqat baytarlıq institutlarının apardığı araşdırmalar zamanı bu dərmanın effektsiz olduğu müəyyənləşib.
Qeyd edək ki, dünən Kənd Təsərrüfatı Nazirliyi yanında Dövlət Baytarlıq Xidmətinə yeni rəis təyin olunub. Nazirliyin mətbuat xidmətinin rəhbəri M.Hacıyev bildirib ki, nazir İsmət Abbasovun aprelin 23-də imzaladığı əmrlə DBX rəisi vəzifəsinə Sialə Rüstəmova təyin edilib.
|
