İstanbulun Hərbiyyə muzeyinin salonunda açılan "ART BOSPHORUS" beynəlxalq sənət yarmarkasında Azərbaycanın xalq rəssamı Arif Hüseynov, İstanbulda yaşayan rəssam Əbülfəz Fərəcoğlu və Ankarada yaşayan rəssam Teymur Ağəlioğlunun yağlıboya tabloları nümayiş etdirilib. Beynəlxalq yarmarkada Gürcüstan, Qırğızıstan, Rusiya, Bolqarıstan rəssamlar ittifaqlarının stendləri yer alıb. Türkiyə və Avropanın bir çox qalereyası da yarmarkada iştirak edib.
Azərbaycanın xalq rəssamı Arif Hüseynovun açıqlamasında keçən il Yaponiyada açdığı sərgidən sonra milli motivdə işləməyi qərarlaşdırdığını söyləyib: "Buraya gətirdiyim yağlıboya tablolarım yeni dönəmdə işlədiyim əsərlərin bir qismini təşkil edir. Gələn il Novruz bayramı münasibətilə Parisdə - YUNESKO-nun sərgi salonunda bu tərzdə daha çox əsər nümayiş etdirəcəyəm".
"ART BOSPHORUS" beynəlxalq yarmarkasında tələbəsi Canan Karanla iştirak edən rəssam Əbülfəz Fərəcoğlu da İstanbulun mədəni həyatının içində olmaq üçün bu səpkili tədbirlərdə iştirakın vacibliyindən bəhs edib. Hər il fərdi və qrup sərgilərində iştirak etdiyini xatırladan Fərəcoğlu bundan sonra İstanbulda keçirilən "Artistanbul" və "Tüyap" yarmarkalarına qatılacağını deyib.
Ankarada yaşayıb-yaradan azərbaycanlı rəssam Teymur Ağəlioğlu isə bu yaxınlarda paytaxtın Çankaya səmtində özəl qalereya açdığını bildirib. Onun sözlərinə görə, Türkiyənin sənət bazarında layiqli yer tuta bilmək üçün sənətkarların yarmarka və sərgilərə yenilikçi əsərlərlə gəlməsi vacibdir.
Yeri gəlmişkən onu da əlavə edək ki, Rusiya Federasiyasının paytaxtı Moskva şəhərində də Azərbaycanın tanınmış rəssamlarının sərgisi təşkil olunub. "Aydan" qalereyasında "Azərbaycanın müasir incəsənəti" adı ilə təşkil olunan sərgidə Leyla Axundzadə, Tərlan Qorçu, Rəşid Axundzadə, Rəşad Ələkbərov, Orxan Hüseynov, Fərid Rəsulov, Eldar Qurbanov və Babi Bədəlovun əsərləri nümayiş etdirilir. Sərginin mayın 9-dək davam edəcəyi nəzərdə tutulur.
|
