Akademik Opera və Balet Teatrının yaradıcı kollektivi Mədəniyyət və Turizm Nazirliyinin xətti ilə mayda keçiriləcək Milli Teatr Festivalı çərçivəsində üç tamaşa ilə çıxış etməyi planlaşdırır. Teatrın mətbuat xidmətindən verilən bilgiyə görə, mayın 2-də teatrın səhnəsində dahi bəstəkar Qara Qarayevin ölməz "Yeddi gözəl" baleti nümayiş olunacaq. 2008-ci ildə yeni quruluşda səhnəyə qoyulmuş "Yeddi gözəl" baletinin festival tamaşasında əsas rollarda əməkdar artistlər İslam İslamov, Kamilla Hüseynova, Yelena Skomorosenko, Alsu Qimadiyeva, Samir Səmədov və başqaları çıxış edəcəklər. Tamaşanı xalq artisti, dirijor Cavanşir Cəfərov idarə edəcək.
Mayın 7-də isə Milli Teatr Festivalı çərçivəsində operasevərlər Ü.Hacıbəylinin "Leyli və Məcnun" operasına tamaşa edə biləcəklər. Həmin tamaşada əsas partiyaları teatrın gənc solistləri Vüsalə Musayeva və İlkin Əhmədov ifa edəcək. Tamaşanın dirijoru əməkdar incəsənət xadimi Sevil Hacıyevadır. Xəbərdə bildirilib ki, mayın 25-də Opera və Balet Teatrının kollektivi Sumqayıt şəhərinə yollanacaq. Həmin gün Sumqayıt Dövlət Musiqili Dram Teatrının binasında sumqayıtlı musiqisevərlər üçün "Leyli və Məcnun" operası nümayiş olunacaq.
|
