Bu günlərdə Beynəlxalq Muğam Mərkəzində Azərbaycan ifaçılıq sənətinin görkəmli təmsilçisi, tarzən, xalq artisti və məşhur həkim-cərrah Hacı Məmmədovun 90 illiyi ilə bağlı mərasim düzənlənəcək. Bu xatirə toplantısı Mədəniyyət və Turizm Nazirliyinin dəstəyi ilə baş tutacaq. Hacı Məmmədov 1920-ci il aprelin 28-də Şamaxı şəhərində doğulub. Yeniyetmə vaxtlarından tar ifaçılığına həvəs göstərib və böyük musiqi qabiliyyəti sayəsində hələ 11 yaşında ikən xalq çalğı alətləri orkestrinə qəbul edilib. 40 ildən çox M.Maqomayev adına Azərbaycan Dövlət Filarmoniyasında çalışan Hacı Məmmədovun şux, oynaq ifa tərzi həmişə diqqəti cəlb edib. O, rus və Qərbi Avropa müəlliflərinin klassik əsərlərinin tarda ilk ifaçısı olub. "Orta Mahur", "Çoban Bayatı" və digər xalq mahnıları onun ifasında çox məşhurdur. Hacı Məmmədov 1957-ci ildə əməkdar, 1963-cü ildə xalq artisti fəxri adlarına layiq görülüb.
|
