Erməni sərhədçilərin oğurluq əməlləri

Dünən səhər saatlarında Marneuli rayonunun Ermənistanla sərhədində azərbaycanlıların yaşadığı Burma kənd sakini Mehralı Şamilova məxsus 8 baş mal-qara erməni sərhədçilər tərəfindən saxlanıb. Bu barədə "Ayna"ya "Sadaxlı Dirçəliş İttifaqı"nın sədri Sabir Mehtiyev məlumat verib. Məlumata görə, erməni sərhədçilər mal-qaranın Ermənistan tərəfinə keçdiyini iddia edirlər. Kənd sakinləri isə bu iddianın əsassız olduğunu qeyd edərək, mal-qaranın qaytarılmasını istəyirlər.

S.Methiyev bildirib ki, hadisə barədə Gürcüstan sərhədçilərinə məlumat verilib. Azərbaycanın Gürcüstandakı səfirliyi də faktla əlaqədar məlumatlandırılıb. Səfirlik baş verənlərlə bağlı Gürcüstanın hüquq-mühafizə orqanlarına müraciət edib. Lakin gürcü sərhədçilər öz dövlət ərazilərinə sahib çıxmağa tərəddüd ediblər. Bundan hiddətlənən 30-a yaxın kənd sakini Ermənistan-Gürcüstan sərhəd məntəqəsində toplaşaraq, gürcü sərhədçilərin onların yaşadıqları ərazilərə nəzarət etmədiklərinə görə narazılıqlarını bildiriblər.

S.Mehtiyevin fikrincə, gürcülərin səhlənkarlığından istifadə edən erməni sərhədçilər tez-tez azərbaycanlıların yaşadıqları kəndlərin ərazilərindən mal-qaranı həyasızcasına yığıb aparırlar.

S.Mehtiyev bildirib ki, günün ikinci yarısında Burma kənd sakinlərinin şikayəti Gürcüstan dövləti tərəfindən təmin olunub və aparılmış mal-qara sahibinə qaytarılıb.