"Kütləvi informasiya vasitələrində APA-ya istinadən Texniki Universitetin tələbələri arasında kütləvi dava olduğu barədə informasiya yayılıb. Burada göstərilir ki, aprelin 7-də axşam saatlarında 10-15 nəfərin iştirak etdiyi davada 4 nəfər bıçaqlanıb. Onlardan ikisi - Nahid Mirzəyev və Əli Qasımov bıçaq xəsarəti ilə xəstəxanaya yerləşdirilib. Bildirmək istəyirik ki, adları göstərilən bu şəxslərin heç biri Azərbaycan Texniki Universitetində təhsil almır".
APA-nın məlumatına görə, bu sözlər Azərbaycan Texniki Universitetinin (AzTU) rektoru, professor Havar Məmmədovun imzası ilə APA-ya daxil olan məktubdandır.
Məktubda bildirilir ki, hüquq-mühafizə orqanları ilə yaradılan əlaqədən o da məlum olub ki, davada AzTU-nun heç bir tələbəsi iştirak etməyib: "Əlavə məlumat üçün bildiririk ki, universitetimizdə təhsil birnövbəlidir və tədris prosesi saat 14:00-da başa çatır".
Qeyd edək ki, Yasamal rayon Polis İdarəsindən APA-ya verilən məlumatda aprelin 7-si axşam saatlarında 28-ci polis bölməsinin ərazisində 10-15 tələbənin iştirakı ilə baş verən davada 4 nəfərin bıçaqlandığı bildirilib. Onlardan ikisi - 22 yaşlı Nahid Mirzəyev və 21 yaşlı Əli Qasımov ağır bıçaq xəsarətləri ilə Klinik Tibbi Mərkəzə yerləşdirilib. Polisdən bildirilib ki, kütləvi davada iştirak edənlərin əksəriyyəti Azərbaycan Texniki Universitetinin tələbələridir.
|
