Bunu dünən Azərbaycan prezidenti yanında Strateji Araşdırmalar Mərkəzində Rumıniyanın Azərbaycandakı səfiri Nikolae Ureki bəyan edib (APA). O bildirib ki, münaqişə ümumilikdə bütün bölgəyə təsir göstərir: "İstənilən münaqişə fəlakət deməkdir və NATO bu problemin yalnız dinc yolla həllini istəyir. Alyans danışıqlar prosesinə birbaşa müdaxilə etmir, çünki bu proses ATƏT Minsk Qrupu çərçivəsində gedir".
Səfir əlavə edib ki, NATO həm Azərbaycan, həm də Ermənistanla balanslaşdırılmış şəkildə əməkdaşlıq edir, çünki hər iki ölkə alyansın tərəfdaşıdır.
N.Ureki həmçinin qeyd edib ki, NATO-nun yeni strateji konsepsiyası 21-ci əsrdə təhlükəsizliyin təminatı və möhkəmləndirilməsinə xidmət edir. N.Ureki NATO-nun Azərbaycan üzrə əlaqələndirici səfirliyinin rəhbəri qismində alyansın tərəfdaş ölkələrlə əməkdaşlıq strategiyası haqqında məlumat verib. Diplomat deyib ki, hərbi-siyasi blokun siyasəti kollektiv təhlükəsizlik, həmrəylik, demokratiya, qanunun aliliyi və insan haqlarına dəstək prinsiplərinə əsaslanır: "Reallıq göstərir ki, heç kim təklikdə təhlükəsizliyi təmin edə bilməz".
Səfirin sözlərinə görə, Rumıniya Azərbaycanın NATO qarşısındakı öhdəliklərini yerinə yetirməsində ona yardımçı ola bilər. Sualları cavablandıran N.Ureki bəyan edib ki, NATO-ya üzv olan ölkə öz ordusunu alyansın standartlarına uyğunlaşdırmaq üçün böyük vəsait sərf etməlidir.
N.Ureki "Nabucco" layihəsinin taleyi barədə də fikirlərini bölüşüb. Onun sözlərinə görə, sözügedən layihə Avropaya qaz nəqlində əsas layihə olub və olacaq.
"Azerbaiyan - Georgia - Romania Interconnection" layihəsi "Nabucco" ilə rəqabət aparmır" deyən səfir "Nabucco" layihəsinin bir sıra ölkələr tərəfindən ratifikasiya olunduğunu xatırladıb və bildirib ki, bu layihənin reallaşması barədə qərarı konsorsium qəbul edəcək:
"Layihənin bu günə kimi reallaşmamasına səbəb maliyyə çatışmazlığıdır. Ümidvarıq ki, "Nabucco" layihəsi planlaşdırıldığı kimi gələn il reallaşmağa başlayacaq. "AGRI" layihəsi "Nabucco"ya rəqib deyil, alternativ layihədir. Avropaya enerji resursları ilə təminata dair alternativ layihələr lazımdır. Bu, mavi yanacağın kifayət qədər yüksək olan qiymətinin aşağı düşməsinə səbəb olardı".
|
