Bu günlərdə İstanbuldakı otellərin birində İlhamə Quliyeva adına Türkiyə-Azərbaycan Mədəniyyət Mərkəzinin təntənəli açılış mərasimi keçirilib. Bu barədə danışan Azərbaycanın və Dağıstanın xalq artisti İlhamə Quliyeva bildirib ki, açılış mərasimində mərkəzin direktoru Sərxan Kərəmoğlu çıxış etdikdən sonra hər iki ölkənin dövlət himni səsləndirilib. Daha sonra Azərbaycanın İstanbuldakı baş konsulu Səyyad Aran açılış lentini kəsib. Tədbirdə iştirak edən Türkiyə və Azərbaycanın nüfuzlu ictimai-siyasi xadimləri, bir sıra iş adamları və incəsənət xadimləri İlhamə xanımı mərkəzin açılışı münasibəti ilə təbrik ediblər, ən xoş arzularını çatdırıblar. Türkiyənin TMB kanalının rəhbəri Naim Burak Elçi çıxış edərək bildirib ki, mərkəz tez bir zamanda öz sözünü deyəcək, Türkiyə və Azərbaycanda nüfuzlu mədəniyyət ocağı kimi yerini tapacaq.
Xeyli insanın iştirak etdiyi tədbirdə mərkəzin ayrıca binasının olması təklifi irəli sürülüb. Konsertdə olduğu üçün açılışda iştirak edə bilməyən müğənni Bülənt Ərsoyun nümayəndəsi təbrik məktubunu tədbir iştirakçılarının diqqətinə çatdırıb. O, məktubunda mərkəzdə İlhamə xanımla ortaq konsert verməyi arzuladığını bildirib. Ümummilli lider Heydər Əliyevin Azərbaycan və Türkiyə birliyinə verdiyi qiyməti özündə əks etdirən şeiri isə Aybəniz Güllər oxuyub. Mərasim İlhamə Quliyevanın çıxışı ilə yekunlaşıb. O, özünün hit mahnılarını ifa edib.
Qeyd edək ki, hazırda İstanbulda olan İlhamə xanım Türkiyənin bir sıra kanallarına dəvət alıb, nüfuzlu verilişlərin qonağı kimi iştirak edir.
|
