Belarusun paytaxtı Minskdə ağır atletika üzrə Avropa çempionatı başlanıb. Qitə birinciliyində ölkəmizin idman şərəfini baş məşqçi Yanko Rusevin rəhbərliyi altında 3 atletimiz qoruyur: Zülfüqar Süleymanov (62 kq), Sərdar Həsənov (69 kq) və Pərvin Fətullayev (94 kq).
Yarışda iştirak edən Azərbaycan idmançılarından podiuma əvvəlcə Zülfüqar Süleymanov çıxıb. O, iki hərəkətin cəminə görə fəxri kürsünün üçüncü pilləsinə yüksəlib. Birdənqaldırmada 132 kq çəkinin öhdəsindən gələn atletimiz təkanla 162 kq çəkini ram edib. İki hərəkətin cəminə görə 294 kq nəticə göstərən Zülfüqar Süleymanov çempion - türkiyəli Erol Bilgindən 10 kq (139+165), gümüş mükafatçı, rumıniyalı Antoniu Bucidən (135+165) isə 6 kq az qaldırıb. Xatırladaq ki, 1 il əvvəl Budapeştdə keçirilən bənzər yarışda cəmi 285 kq (125+160) qaldıran Zülfüqar Süleymanov gümüş medal qazanmışdı. я Yarışın ikinci günü, Zülfüqarın ardınca Sərdar Həsənov da mükafatçılar sırasına düşməyə cəhd göstərsə də, səyləri uğursuz bitib. Birdənqaldırmada 135 kq ştanqı başı üzərinə qaldıran Sərdar təkanla qaldırmada 167 kq ağırlığın öhdəsindən gəlib. Beləliklə, o, 302 kq nəticə ilə qitə çempionatını 5-ci yerdə başa vurub. Qızıl medal rumın atleti Ninel Nikulesku (333 kq), gümüş isə rusiyalı Mixail Qobevə (319 kq) nəsib olub. Türkiyəli atlet Mete Binay isə (314 kq) bürünc medala sahib çıxıb.
Sonuncu iştirakçımız Rəvan Fətullayev körpücük üzərinə bu gün çıxacaq.
Ağırlıqqaldırma üzrə ikiqat dünya çempionumuz Nizami Paşayev Avropa çempionatına yollansa da, yarışda çıxış etmir. Azərbaycan Ağır Atletika Federasiyasından aldığımız məlumata görə, N. Paşayev qitə çempionatına yığmanın baş məşqçisi Yanko Rusevin köməkçisi qismində yollanıb. Hazırda yeniyetmələrdən ibarət yığma komandaya başçılıq edən Nizami Paşayev daha mötəbər yarış sayılan və 2012-ci il London Yay Olimpiya Oyunlarına lisenziya verən dünya çempionatında mübarizə aparmaq niyyətindədir. Avropa çempionatı isə perspektivli idmançılarımızı yoxlamaq baxımından əhəmiyyətlidir.
Xatırladaq ki, baş məşqçi Yanko Rusev də əsas diqqəti sentyabrın 18-dən 30-dək Türkiyənin Antalya şəhərində təşkil olunacaq dünya çempionatına yönəltməyi düşünür: "Avropa çempionatında 3 atletimiz çıxış edir. Dünya çempionatında isə 10 atletimiz mübarizə aparacaq. Əsas məqsəd 2012-ci il London Yay Olimpiya Oyunlarına lisenziya xarakterli ilk dünya çempionatında uğurla çıxış etməkdir. Bu il Antalyada, gələn il isə Parisdə dünya çempionatlarında layiqli nəticələr göstərərək, qarşıdakı olimpiadaya kişilər üçün nəzərdə tutulan 6 lisenziyanın hamısını qazanmaq niyyətindəyik".
|
