Heydər Əliyev Sarayında "Planet Parni iz Baku" KVN Teatrının "Ağ-qara" adı altında 4 günlük yeni proqramları təqdim edilib. Proqram Milli Məclis sədrinin birinci müavini mərhum Afiyəddin Cəlilovun xatirəsinə ithaf edilib. İkisaatlıq proqramda teatr kollektivinin ifasında hazırlanan tam yeni nömrələrdə maraqlı məqamlar diqqət çəkib.
İlk səhnə Tahir İmanovun yerli telekanallardan birində yayımlanan "Günəbaxan" verilişinin aparıcısı Turan İbrahimovun parodiyası olub. Proqram yerli televiziyalardakı verilişlərin, eləcə də xəbərlər proqramının bir neçəsinin aparıcılarının parodiyası ilə davam edib. Teatr kollektivinin ifasında AzTV, ANS, Xəzər telekanallarında yayımlanan bəzi verilişlər özünəməxsus şəkildə tamaşaçıların diqqətinə çatdırılıb.
Proqramda xüsusi diqqət çəkən nömrələrdən biri yerli müğənnilərin dünyanın tanınmış ulduzları ilə eyni səhnəni paylaşması olub. Bu zamana kimi müğənnilərimizin ürəyində qalan bu arzunu qeyri-real olsa da, KVN Teatrı həyata keçirib. Niyaməddin Musayevin dünyanın məşhur "Deep Purple" qrupu ilə, İlqar Muradovun, Rəhim Rəhimlinin "Lyube" qrupu ilə, Cavanşir Məmmədovun "Eniqma" ilə, Elza Seyidcahanın Al Bano ilə, Sevda Ələkbərzadənin isə Lənkəran nənələri ilə səhnəni paylaşması və duet ifa etməsi çox maraqla qarşılanıb. Elza Seyidcahan Al Banonun çox məşhur "Feliçita" mahnısını oxuyarkən Al Banonun elə səhnədəcə ürəyinin dayanması isə tamaşaçıların alqışları ilə qarşılanıb.
Parodiya edilən müğənnilər arasında cazmen Cavan Zeynallı da olub. Teatrın bədii rəhbəri Tahir İmanovun öncədən də dediyi kimi, KVN Teatrı kollektivinin ifasında parodiya edilənlər arasında Azərbaycanın, eləcə də digər ölkələrin dövlət rəsmiləri də olub. Bu sırada Azərbaycanın dövlət başçısı İlham Əliyev, Rusiyanın baş naziri Vladimir Putin, Ermənistanın prezidenti Serj Sarqsyan, Moskva meri Yuri Luşkov, Bakı meri Hacıbala Abutalıbov, "Azal" Şirkətinin prezidenti Cahangir Əsgərov, Bakı Metropoliteninin rəisi Tağı Əhmədov və Dövlət Yol Polisi əməkdaşları maraqlı şəkildə parodiya olunub.
İlk dəfə olaraq məhz KVN Teatrının ifasında "avtomobillərin toyu" təşkil olunub. Hər zaman olduğu kimi KVN Teatrı proqramını "Məhəllə" nömrəsi ilə yekunlaşdırıb. Bu nömrənin sonunda isə Tahir İmanov yaratdığı obraz vasitəsi ilə bütün Azərbaycan xalqına müraciət edib. O, azərbaycanlıları Vətəni bölməməyə, yerliçilik sindromundan qaçmağa, "yeraz" ifadəsini isə unutmağa çağırıb.
Proqramda 9 il fasilədən sonra Azər Məmmədzadənin səhnəyə qayıdışı sevindirici məqamlardan biri olub. İkisaatlıq proqramda nümayiş olunan nömrələrdə əməkdar artist Elçin Həmidov, aktyorlar Bəhram Bağırzadə, Tahir və Cabir İmanovlar, Azər Məmmədzadə və başqaları çıxış ediblər.
|
