Azərbaycan ədəbiyyatının görkəmli ismi, böyük dramaturq Cəfər Cabbarlının indiyədək heç yerdə adı açıqlanmayan romanı üzə çıxıb. Bu barədə dramaturqun nəvəsi, Cəfər Cabbarlı ev muzeyinin baş elmi işçisi Qəmər Seyfəddinqızı məlumat verib. Onun sözlərinə görə, "Kazım bəy" adlanan bu romanı Cabbarlı 13 yaşı olanda yazmağa başlayıb. Lakin tamamlamayıb. Ərəb əlifbası ilə yazılan romanın əlyazması Teatr Muzeyində saxlanır. Dramaturqun ilk və son romanı olduğu güman edilən bu əsər üzərində hazırda elmi araşdırma aparılır.
Onu da qeyd edək ki, ilk dəfə 10 il bundan öncə təsis edilən Cəfər Cabbarlı mükafatının təqdimat mərasiminin vaxtı məlum olub. Tədbir aprelin 16-da Rəşid Behbudov adına Mahnı Teatrında baş tutacaq. Bu barədə Cəfər Cabbarlı ev muzeyinin baş elmi işçisi, dramaturqun nəvəsi Qəmər Seyfəddinqızı bildirib. Onun sözlərinə görə, həmin gün mükafat qaliblərinin adları açıqlanacaq və onlar fəxri diplomlarla təltif olunacaqlar. Qaliblər kino xadimi, rejissor, aktyor işi, bəstəkar, publisist və digər nominasiyalar üzrə müəyyənləşib. Tədbirdə dramaturqun yaradıcılığına da nəzər salınacaq, şeirləri, əsərlərindən parçalar ifa olunacaq. Qeyd edək ki, mükafat Cəfər Cabbarlı adına Mədəniyyət, Elm və Təhsilin İnkişafına Yardım İctimai Birliyi və Cəfər Cabbarlı ev-muzeyi tərəfindən təsis olunub.
|
