Moskvada Qlinka adına Musiqi Mədəniyyəti Mərkəzi Dövlət Muzeyində Azərbaycanın Rusiya səfirliyi və Heydər Əliyev Fondu Moskva nümayəndəliyinin təşkilatçılığı ilə Azərbaycan muğam axşamı keçirilib. Azərbaycanın Rusiya səfiri Polad Bülbüloğlu, Heydər Əliyev Fondu Moskva nümayəndəliyinin rəhbəri Leyla Əliyeva və çoxsaylı qonaqlar əvvəlcə Azərbaycan muğam sərgisinə baxış keçiriblər. Rusiya mədəniyyət nazirinin müavini Andrey Busıgin tədbirin təşkilatçılarına təşəkkürünü bildirib. Heydər Əliyev Fondu Moskva nümayəndəliyinin rəhbəri Leyla Əliyeva qeyd edib ki, muğam hər zaman Azərbaycan mədəniyyətinin sərvəti olub: "Bizim üçün muğam dilimiz, incəsənətimiz və ədəbiyyatımızla yanaşı duran genetik koddur. Muğam özündə muğam operası, caz-muğam və s. janrları birləşdirib və onun adı Üzeyir Hacıbəyov, Niyazi, Vaqif Mustafazadə kimi dahi mədəniyyət xadimləri ilə sıx bağlıdır". Azərbaycanın Rusiya səfiri Polad Bülbüloğlu isə Heydər Əliyev tərəfindən əsası qoyulan ənənələri Azərbaycan prezidenti İlham Əliyevin, Heydər Əliyev Fondu prezidenti Mehriban Əliyevanın və Heydər Əliyev Fondu Moskva nümayəndəliyinin rəhbəri Leyla Əliyevanın layiqincə davam etdirdiyini vurğulayıb. Sonda Azərbaycan muğamının tarixi və müasir vəziyyətindən bəhs edən sənədli film nümayiş etdirilib. Ötən il Bakıda keçirilən Beynəlxalq Muğam Müsabiqəsi qaliblərinin və laureatlarının iştirakı ilə konsert olmuşdur.
|
