Yazıçı-dramaturq Elçin Hüseynbəylinin "Yol ayrıcında qaçış" romanının ilk variantı ekran həllini tapacaq. Müəllifin bildirdiyinə görə, roman Türkiyədə ekranlaşdırılacaq. Onun sözlərinə görə, əsər artıq Türkiyəyə göndərilib və tezliklə bədii filmin çəkilişlərinə TRT1 kanalında start veriləcək.

"Bu təklif mənə ötən il Türkiyədən gəlib. TRT1 kanalının kino çəkilişləri şöbəsi ideyasını açıqladı və ortaq məxrəcə gələ bildik. Burada iki bacının taleyindən bəhs edilir" - deyə dramaturq bildirdi.

Elçin Hüseynbəylinin fikrincə, roman eyni zamanda qloballaşma dövründə çaşqınlığa düşən və yolunu azan insanların həyatını əks etdirir. Sözünün davamında romanın müəllifi bildirdi ki, filmin bütün xərclərini Türkiyə tərəfi öz üzərinə götürüb. Ekran işini türk rejissor və aktyorlar ərsəyə gətirəcəklər. Sonda bəlli oldu ki, romana bəzi əlavələr etmək məqsədi ilə müəllif yaxın günlərdə İstanbula yola düşəcək.