Dünən, aprelin 9-da, Mədəniyyət və Turizm Nazirliyində Azərbaycan Respublikasının mədəniyyət və turizm naziri Əbülfəs Qarayevin Mavritaniya İslam Respublikası xarici işlər və əməkdaşlıq naziri Maha Mint Muknassla görüşü keçirildi.
Cənab nazir qonaqları salamlayaraq iki islam ölkəsinin mədəniyyət əlaqələrindən söz açdı. Əbülfəs Qarayev Maha Mint Muknassı Azərbaycanın mədəniyyəti, siyasəti və iqtisadiyyatı ilə tanış etdi:
"Biz bir çox Avropa təşkilatlarının üzvüyük və dünyanın ayrı-ayrı qitələrində yerləşməyimizə baxmayaraq, ikimiz də İslam Ümmətinə daxilik. Azərbaycanda Avropa mədəniyyət nazirlərinin toplantısında ilk dəfə olaraq 10 ölkənin naziri dəvət edilmişdir. Həmçinin islam ölkələri mədəniyyət nazirlərinin toplantısında bir neçə Qərb ölkələrinin mədəniyyət naziri iştirak etmişdi. Son 2-3 il ərzində Azərbaycanda 10-a qədər ölkənin mədəniyyət günləri keçirilmişdir. Hesab edirəm ki, mədəniyyət sahəsinin ölkələrarası siyasətə böyük təsiri var. Və biz sizin xalq yaradıcılığınızla sərgilər, tamaşalar, konsertlər vasitəsi ilə tanış olmaq istəyirik. Onu da qeyd etmək istəyirəm ki, yaxın 2-3 il ərzində biz də Mavritaniyada Azərbaycanın mədəniyyət günləri keçirməyə hazır olacağıq. Düşünürəm ki, bu əməkdaşlığımızı, dostluğumuzu birgə olan fəaliyyətimizi tənzimləyəcəyik. Əgər Azərbaycan abidəsi məhv olursa, bu tək bizim yox, bütün islam dünyasının ağrısı olmalıdır".
Daha sonra söz qarşı tərəfə, xanım Maha Mint Muknassa verildi:
"Verdiyiniz geniş məlumata görə sizə öz təşəkkürümü bildirirəm. Bildirmək istəyirəm ki, biz sizin mədəniyyət siyasətinizi dəstəkləyirik. Azərbaycanın güclənməsi isə islam dünyasının güclənməsi deməkdir. Sizin ölkə daima inkişaf edir. Bu isə müdrik siyasətdən xəbər verir. Ümidvaram ki, bizim əməkdaşlığımız davam edəcək".
Görüşün sonunda geniş mədəniyyət əlaqələrinin qurulması və müvafiq işlərin görülməsi məqsədi ilə Azərbaycan və Mavritaniya arasında qarşılıqlı əməkdaşlığa dair ilkin sənəd imzalandı.
|
