Azərbaycanda rayon adlarının dəyişdirilməsi davam edir. Dünən Milli Məclis daha bir rayonun - Dəvəçinin adının dəyişdirilməsi məsələsinə baxıb. Deputatlara Dəvəçinin adının Şabrana dəyişdirilməsi təklif olunub.

Deputatlara təqdim edilən layihədə rayonun adının Şabran olması təklif edilib. Lakin müzakirələr zamanı Yeni Azərbaycan Partiyası icra katibinin müavini Siyavuş Novruzov Dəvəçinin adının dəyişdirilməsinə qarşı çıxıb. Bu cür ad dəyişikliklərinə son qoyulmasını tələb edən YAP-çı deputat deyib ki, hər rayonun qədim adının bərpa edilməsi düzgün deyil: "Naxçıvan əvvəllər Atabəylər adlanıb (?). İndi neyləyək, Naxçıvanın adını dəyişib Atabəylər qoyaq?". Milli Məclisin regional məsələlər komitəsinin sədri Arif Rəhimzadə deyib ki, Dəvəçi adı indi rayonun 20 kilometrliyində yerləşən Təzəkəndə veriləcək. Qeyd edək ki, 1930-cu ildə yaradılmış Dəvəçi rayonunun ərazisi 1,7 min kvadratkilometr, əhalisi 50 min nəfərə yaxındır.

Narazılıqlara baxmayaraq, rayonun adının dəyişdirilməsi haqqında təklif səsə qoyularaq qəbul olunub. 88 deputat qərarın lehinə, 2 deputat əleyhinə səs verib.