Azərbaycan hakimiyyətinin Dağlıq Qarabağı müharibə yolu ilə də olsa azad edəcəyi ilə bağlı verdiyi bəyanat Ermənistan hakimiyyətinin əməlli-başlı karına gəldi. Ermənistan müxalifətinə yaxın tert.am saytının yaydığı məlumata görə, Azərbaycanın müharibə edəcəyini bəhanə gətirən Ermənistan iqtidarı bu yolla əhalini nəzarətdə saxlamaq istəyir.
Bəlli olduğu kimi, Ermənistanda son prezident seçkiləri zorakılıqla müşahidə olunmuşdu. Seçkilərin nəticələrinə etiraz edən onlarca dinc vətəndaş İrəvan küçələrində qanına qəltan edilmişdi. Məhz bu yolla iqtidara gələn Serj Sarqsyan müxalifət qüvvələrinin yenidən aktivləşdiyini görərək, indi də ölkədaxili stabilliyi müharibə şantajı ilə nəzarətə götürmək istəyir.
Yayılmış məlumatdan o da aydın olur ki, əslində Azərbaycanın tezliklə müharibəyə başlayacağını bəhanə edən rəsmi İrəvan ordusunu daim döyüş vəziyyətində saxlayır və ordu azərbaycanlılara qarşı deyil, yenidən ermənilərə qarşı istifadə edilə bilər. Amma siyasi dairələr həm bu ehtimal, həm də mümkün müharibə ehtimalından da ehtiyat edirlər.
|
